2025 йилда миллий валютадаги депозитлар ва кредитлар бўйича реал фоиз ставкалари ошди. Бу ҳақда Марказий банк маълумотларида келтирилган.

Реал фоиз ставкаси номинал фоиз ставка ва инфляцион кутилмалар ўртасидаги фарқни билдиради. У депозитларнинг ҳақиқий самарадорлигини ва кредитларнинг ҳақиқий қийматини акс эттиради.

Жисмоний шахсларнинг сўмдаги депозитлари бўйича ўртача тортилган реал фоиз ставкаси йил давомида 6,7% дан 8,2% га ошди. Минимал кўрсаткич февраль ойида (5,9%) қайд этилган бўлса, апрель ойидан бошлаб узлуксиз ўсиб бориб, ноябрь ойи якуни бўйича 8,5% лик энг юқори кўрсаткичга етди.

Юридик шахсларнинг муддатли депозитлари бўйича реал фоиз ставкаси декабрь ойида 4,8% ни ташкил этди, бу йил бошига нисбатан 1,4% га юқори. Депозитлар февраль ойидаги энг паст даражадан (2,7%) сўнг тўрт ой давомида ўсиб, июнь ойида 5,5% билан максимумга чиқди.

Шу билан бирга, ноябрь ойига нисбатан жисмоний шахсларнинг депозитлари бўйича реал фоиз ставкалари 0,3 фоиз бандга, юридик шахсларда эса 0,5 фоиз бандга пасайди.

Жисмоний ва юридик шахслар учун реал кўринишдаги кредитлар ҳам йил бошидаги пасайишдан кейин сезиларли даражада кўтарилди. Йил якунлари бўйича ўртача реал фоиз ставкалари мос равишда 10,1% (+2,1%) ва 9,4% (+1,9%) ни ташкил этди.

Тижорат кредитлари бўйича аҳоли учун реал фоиз ставкаси 10,7% ни ташкил этиб, бир ойда 0,5 фоиз бандга, йил бошидан эса 2% га ўсди. Юридик шахсларда ҳам бу кўрсаткич 10,7% ни ташкил этади — бу январь ойига нисбатан 2,2% га кўп, ноябрь ойига нисбатан эса 0,8 фоиз бандга кам.

Имтиёзли кредитларнинг реал фоиз ставкалари аҳоли учун -0,1% ни, бизнес учун -1,1% ни ташкил этди. Шу билан бирга, центабрдан ноябргача ижобий диапазонда шаклланиб, мос равишда 0,3% ва 0,1% га етди.