Ўзбекистондаги банкларда муаммоли кредитлар миқдори бир йилда 3,1 триллион сўмга камайди. Давлат банклари 1,5 триллион сўм, хусусий банклар 1,6 триллион сўмлик муддати ўтган қарзларни сўндира олган.

2026 йил 1 январь ҳолатига кўра, республикадаги банкларнинг жами кредит қолдиғи 604 триллион сўмга етган. Шундан 18,1 триллион сўми (3 фоиз) муаммоли кредитлар ҳисобланади. Таққослаш учун, 2025 йил 1 январда умумий кредитлар 533,1 триллион сўм бўлган. Бунинг 21,2 триллион сўми муддати ўтган (муаммоли) қарзлар эди.

Марказий банк таҳлилида келтирилишича, ўтган ой бошида муаммоли кредитларнинг 70 фоизи—12,8 триллион сўм давлат банкларига тегишли бўлган. Қолган 5,2 триллион сўмлик муддати ўтган қарзларни хусусий банклар ажратган.

Давлат банклари орасида энг катта миқдордаги муаммоли кредитлар Ўзмиллийбанкда қайд этилган—3 триллион сўм. Бир йил илгари бу кўрсаткич 3,3 триллион сўм бўлган. Шу билан бирга, Агробанк (2,7 триллион сўм),

Ўзсаноатқурилишбанк (1,6 триллион сўм) ва Асака банкда (1,5 триллион сўм) муддати ўтган кредитлар улуши нисбатан юқорилигича қолган.

Хусусий банклар орасида энг кўп муаммоли кредитлар Ипотека-банкда қайд этилган —1,25 триллион сўм. Лекин бир йил олдин мазкур банк ҳисобидаги муддати ўтган қарзлар миқдори 3,57 триллион сўм бўлган. Яъни 12 ой ичида 2,3 триллион сўм муаммоли кредитларни ундиришга эришилган.

Хусусий банклар орасида Капитал банк муаммоли кредитлари улуши ҳам нисбатан юқори — 1 триллион сўм. Бироқ бу рақам бир йил аввалгидан 400 миллиард сўмга камайган.

Умуман олганда, республикада охирги беш йил давомида муаммоли кредитлар улуши сезиларли ортган. Хусусан, 2021 йил 1 январда жами муддати ўтган қарзлар 5,8 триллион сўм эди. Орадан бир йил ўтиб бу рақам бирданига 17 триллион сўмга чиққан. Мазкур кескин ўсиш пандемия ва ундан кейинги тикланиш даврига тўғри келган. 2023 йил январда 14 триллион сўмлик, 2024 йил бошида 16,6 триллион сўмлик муаммоли кредитлар қайд этилган.