Ўзбекистонда 2026 йил январда энг кўп ишлаб чиқарилган автомобиль Cobalt бўлди. Бу ҳақда Статистика қўмитаси маълумот берди.

Ўтган ойда мамлакатда жами 22 099 дона енгил автомобиль ишлаб чиқарилган. Мазкур кўрсаткич 2025 йил мос даврига нисбатан 6 846 тага кўп.

Ой давомида барча автомобиль компанияларида ишлаб чиқариш ҳажми ўсган. Энг кўп автомобиль улуши Cobalt ҳиссасига тўғри келган — 6 993 дона. Таққослаш учун, ўтган йил январидаги рақам 5 660 дона бўлган.

Кейинги ўринни Damas эгаллаган — 3 628 дона. Бир йил илгари қайд этилган рақам 2 765 дона эди.

Январь ойида 1 900 дона Tracker (бир йил олдин 1 334 та), 1 974 дона Onix (2025 йил илк ойида 1 462 та) ишлаб чиқарилган. Шу билан бирга, Kia улуши 2 298 донани (бир йил илгари 1 978 та), BYD эса 1 352 донани (ўтган йил январда 802 та) ташкил этган. Ўз навбатида 1 135 дона Haval (2025 йил январда 373 та), 757 дона Chery (бир йил олдин 594 та) машиналари ишлаб чиқарилгани қайд этилган.

Маълумот учун, 2025 йилда Ўзбекистонда жами 257,8 мингта енгил автомобиль ишлаб чиқарилган. «Ўзбекистон 2030» стратегиясига кўра, келгуси беш йилда бу кўрсаткич 1 миллион донага етказилади. Хусусан, 2027 йилда 550 минг дона, 2028 йилда 700 мингта енгил автомобиль ишлаб чиқариш режалаштирилган. Мазкур рақамлар 2029 йилга бориб 800 мингтага чиқади.