Ўзбекистонда 2026 йилнинг иккинчи ярмида асосий ставка 13 фоизгача пасайтирилиши кутилмоқда. Бу ҳақда Евросиё тараққиёт банки ўз прогнозларини эълон қилди.

Халқаро молия институти таҳлилида Ўзбекистон иқтисодиётига оид қатор кутилмалар келтирилган. Хусусан, асосий ставка масаласига алоҳида тўхталиб ўтилган. Қайд этилишича, 2025 йил мартдан бери республикада асосий ставка йиллик 14 фоиз даражасида сақлаб келинмоқда. Бугунги иқтисодий вазият эса мазкур даражани пасайтиришга йўл очиши мумкин.

Мамлакатда реал фоиз ставкаси тахминан 6,8 фоизни ташкил этади. Бу нисбатан қаттиқ пул-кредит шароитларидан далолат беради. Инфляция мақсадли кўрсаткичга (5 фоиз) яқинлашишда давом этар экан, Марказий банк асосий фоиз ставкасини пасайтиришни бошлаш учун имкониятга эга бўлади — биз унинг 2026 йилнинг иккинчи ярмида тахминан 13 фоиз бўлишини кутмоқдамиз, дея прогнозларини билдирган ЕТБ.

​Таҳлилда 2025 йил давомида мамлакат иқтисодий ўсиши 7,7 фоизгача тезлашгани қайд этилган. Жорий йилда эса ялпи ички маҳсулот ҳажми ўсиши секинлашиши кутилмоқда.

«Ўзбекистон иқтисодиёти 2026 йил бошида ҳам жадал ривожланишда давом этди. Январь ойи якунларига кўра, саноат ишлаб чиқариши йиллик ҳисобда 7,8 фоизга ошди. Чакана савдо ҳажми январь ойида йиллик 14,7 фоизга кўпайди. Ҳар икки кўрсаткич 2025 йил ўртача даражаларидан (мос равишда 6,8 фоиз ва 11,2 фоиз) юқори. 2026 йилда ялпи ички маҳсулот ўсиши 6,7 фоизни ташкил этиши кутилмоқда», дейилади таҳлилда.

​Ўз навбатида қаттиқ пул-кредит сиёсати таъсирида инфляция секинлашгани ҳам эслаб ўтилган. ЕТБ жорий йил якунида инфляция даражаси 7 фоиздан пастга тушишига ҳам урғу берган.

«Мамлакатда инфляция сўнгги тўққиз йилдаги энг паст даражага тушди. Инфляцияни қаттиқ пул-кредит шароитлари, миллий валютанинг мустаҳкамланиши ва импорт нархлари динамикаси жиловламоқда. 2026 йил охирига бориб инфляция 6,7 фоизгача пасайиши кутилмоқда», дейилади таҳлилда.