Ўзбекистонда ерларнинг катта қисми қурғоқчил ва деградацияга учраган. Оқибатда мамлакат иқтисодиётига йилига 830 миллион доллар зарар етмоқда. Бу ҳақда 23 март куни президент Шавкат Мирзиёевга қилинган тақдимотда маълумот берилган.

Президент матбуот хизмати хабарига кўра, давлат раҳбари экология ва атроф-муҳитни муҳофаза қилишга оид қатор лойиҳалар билан танишган. Хусусан, чўлланишга қарши кураш стратегияси лойиҳаси алоҳида кўриб чиқилган.

“Қайд этилганидек, Ўзбекистон ҳудудининг 70 фоизи арид зонадан (қурғоқчил-таҳр.) иборат бўлиб, ерларнинг 70 фоиздан ортиғи деградацияга учраган. Ер ресурсларининг ёмонлашуви иқтисодиётга ҳар йили 830 миллион доллар зарар келтирмоқда. Орол денгизининг қуриши натижасида 3 миллион гектар майдон яроқсиз ҳолга келган ва ҳудуднинг 56 фоизи шамол эрозияси таъсири остида қолган”, дейилади хабарда.

Тақдимотда Green University ҳузурида минтақавий қўшма илмий-тадқиқот марказини ташкил этиш таклиф қилинган. Марказ чўлланишни бошқариш бўйича Марказий Осиёдаги биринчи илмий хабга айланиши кўзда тутилмоқда. Унинг таркибида 15 та ихтисослашган лаборатория фаолият юритади, спутник маълумотлари, GIS ва масофадан зондлаш технологиялари асосида ерлар ҳолатини рақамли мониторинг қилиш йўлга қўйилади.

“Қурғоқчиликка чидамли ўсимликлар бўйича генетик банк шакллантирилади, тупроқнинг кимёвий ва физик таҳлил тизими такомиллаштирилади. Бунинг натижасида чўлланишни прогноз қилиш ва хариталаш миллий тизими яратилади, Оролбўйи ва қурғоқ ҳудудларда яшил қоплама кенгайтирилади, яйловлардан барқарор фойдаланиш ҳамда чўл иқтисодиёти моделлари жорий этилади”, дея маълум қилди президент матбуот хизмати.

Давлат раҳбари тақдимот қилинган лойиҳаларни маъқуллаган.