Нақд пулсиз тўлов қийинчилик эмас, балки қулайлик яратиш мақсадида қилинмоқда. Бу ҳақда 27 март куни Тошкент шаҳрида ўтказилган матбуот анжуманида маълум қилинди.

Марказий банк раисининг биринчи ўринбосари Нодирбек Сайдуллаевнинг таъкидлашича, заправкада тўлов қилишда банк картаси уйда қолиб кетиши ёки пластикда пули қолмаса ҳам ишини битказиш чораси кўрилади.

“Заправкаларда нақд пулсиз тўлов қилишда муаммо бўлмаслиги учун шароит яратилади. Нақд пулсиз тўловга ўтилиши фуқаролар учун тушунарли ва қулай бўлади”, деди Нодирбек Сайдуллаев.

Унинг қўшимча қилишича, бунинг натижасида тўлов тарихи шаклланади, аҳоли ва бизнеснинг далил базаси яратилади.

“Нақд пулсиз тўловлар чеклов ёки қийинчилик эмас, қулайлик яратиш учун жорий этиляпти”, деди Марказий банк раисининг биринчи ўринбосари.

Матбуот анжуманида сўз олган иқтисодиёт ва молия вазири ўринбосари Аҳадбек Ҳайдаров нақдсиз тўловлар ортидан банкларда пул айланиши кўпайишини маълум қилди. У мисол тариқасида Ўзбекистонда кунига ўртача 1600 та машина сотилишини айтди.

“Ҳар 100 та машина сотилиши банк тизимига ўртача 20 миллиард сўм пул киритилишини англатади. Бу кўрсаткич йиллик ҳисобда 60 триллион сўмга етиши мумкин… Нақд пулсиз тўлов натижасида банкларда триллионлаб маблағ айланади”, деди иқтисодиёт ва молия вазири ўринбосари Аҳадбек Ҳайдаров.

Шу билан биргаликда, уй-жой ва автомобиль сотувида нақдсиз битимларда нарх қандай белгиланишига давлат органлари аралашмаслиги ва назорат қилмаслиги айтилди. Қонунчиликдан келиб чиқиб, Эскроу ҳисобварақлар орқали уй-жой ва автомобиль олди-сотдиси фақат миллий валютада ўтказилиши қўшимча қилинди.

​Солиқ қўмитаси раиси ўринбосари Жаҳонгир Абдиев эса бу тизим солиққа ҳам ижобий таъсир ўтказишини таъкидлади.

“Нақдсиз тўловлар республикада айланадиган 28 мингта товарлар савдосига таъсир қилади. Бундай тўловлар республикадаги умумий товарлар савдосининг 7 фоизини қамраб олади. Шундан 27 мингтаси алкоголь маҳсулотлари, 561 таси кўчмас мулк, 5 мингтаси 25 миллион сўмдан қиммат сотиладиган товарлардир”, деди  Жаҳонгир Абдиев.

Бундан ташқари, МБ вакили карталарга нақд пул кирим қилинганлик учун комиссиялар масаласида аралаша олмаслиги, тижорат банкларидан турли акцияларни кутиб қолишини билдирди.