Президентнинг атмосфера ҳавоси сифатини яхшилашга қаратилган Тоза ҳаво лойиҳасини амалга ошириш бўйича фармонига мувофиқ мамлакатда транспорт тизимини экологик жиҳатдан такомиллаштириш чора-тадбирлари белгиланди.

Энергетика вазирлигига 2026 йил 1 ноябрга қадар Ўзбекистондаги барча нефтни қайта ишлаш заводларини модернизация қилиш ҳамда уларни ривожлантириш дастурини ишлаб чиқиб, Вазирлар Маҳкамасига киритиш топширилди.

Дастур бундай заводларнинг 2028 йил 1 ноябрга қадар «Евро-4», 2030 йил 1 мартдан бошлаб «Евро-5» экологик тоифа талабларига мувофиқ бўлган мотор ёқилғиларини ишлаб чиқаришини назарда тутади.

Шавкат Мирзиёев раислигида 23 март куни экология ва атроф-муҳитни муҳофаза қилиш соҳасида 2026−2030 йилларга мўлжалланган устувор умуммиллий лойиҳалар юзасидан ўтказилган тақдимотда мотор ёқилғиси стандартларини босқичма-босқич кучайтириш режалари маълум қилинганди.

Шунингдек, Экология қўмитаси жорий йил якунига қадар «Экологик транспорт» тизими доирасида Тошкент шаҳрининг ҳудуди «қизил», «сариқ» ва «яшил» зоналарига ажратиб чиқилишини таъминлаши керак. 2025 йил ноябрь ойида қабул қилинган ҳукумат қарори билан бундай зоналар ташкил этилиши белгиланганди.

Ушбу тартиб кучга киргандан кейин, экологик зоналарда махсус йўл белгиси ўрнатилади, «ўрта» ва «зарарли» тоифадаги, шунингдек экологик стикери бўлмаган автомобилларнинг ҳаракати тақиқланади. Қоидабузарлик жавобгарликка сабаб бўлади.

Бундан ташқари, йил охирига қадар пойтахтдаги барча автотранспорт воситаларига экологик тоифасини тасдиқловчи экологик стикерлар берилади. Ички ишлар вазирлиги экостикер тақдим этилишини таъминлаш бўйича тегишли чора-тадбирларни амалга ошириш вазифаси қўйилди.