Сенатнинг навбатдаги ялпи мажлисида янги таҳрирдаги «Автомобиль йўллари тўғрисида»ги қонун маъқулланди.

Ҳозирда амалдаги қонун бугунги кун талабларига тўлиқ жавоб бермаслиги, унинг янги таҳрири билан автомобиль йўлларини ривожлантириш, улардан фойдаланиш тартибини белгилаш, йўл фаолияти соҳасидаги муносабатларни янги талаблар асосида тартибга солиш кўзда тутилиган.

Қонунда автомобиль йўллари соҳасида амал қилиниши шарт бўлган қуйидаги асосий принциплар аниқ белгиланмоқда:

• йўллар илмий ҳисоб-китоблар асосида лойиҳаланиши;
• қарорлар очиқ ва шаффоф бўлиши;
• йўл ҳаракати хавфсизлиги таъминланиши;
• табиатга зарар етказилмаслиги;
• ҳар бир фуқаро йўллардан тенг ва қулай фойдаланиш имкониятига эга бўлиши.

Ҳужжатда муҳим янгилик сифатида автомобиль йўллари бепул ёки белгиланган тартибда пулли бўлиши мумкинлиги мустаҳкамланмоқда. Қонунга мувофиқ автомобиль йўллари соҳасидаги махсус ваколатли орган сифатида Транспорт вазирлиги ҳузуридаги Автомобиль йўллари қўмитаси белгиланмоқда.

Шунингдек, йўл ҳаракати хавфсизлигини таъминлаш учун автомобиль йўлларида сунъий тўсиқлар ва нотекисликлар яратиш тақиқланмоқда, оғир вазнли ва йирик габаритли транспорт воситаларининг ҳаракатланиши эса фақат махсус рухсатнома асосида амалга оширилади.

Пулли йўлларни ташкил этиш, давлат-хусусий шериклик асосида молиялаштириш, тўловларни автоматлаштирилган тарзда ундириш, фойдаланувчи ва оператор ўртасидаги оммавий шартнома каби муносабатлар тартибга солинмоқда.

Сенаторлар қонун нормалари йўлларни асраш, авариялар сонини камайтириш ва инсон ҳаётини муҳофаза қилишга, шунингдек, ҳаракат тезлиги ортиб, тирбандликлар камайишига хизмат қилишини таъкидлади. Лойиҳа Қонунчилик палатаси томонидан 2025 йилнинг центабр ойида қабул қилинганди.