Эндиликда яроқсиз ҳолга келган ёки шикастланган автомобиль давлат рақами белгисини онлайн алмаштириш мумкин.

Ягона интерактив давлат хизматлари порталида (my.gov.uz) ушбу хизмат ишга туширилди. Ундан фойдаланиш учун порталга кириб, «Шикаст етган автотранспорт воситасининг давлат рақами белгисини тиклаш» хизматини танлаш керак.

Аризани тўлдириш жараёнида керакли давлат рақами белгиси сонини танлаш, шикастланган давлат рақамининг фотосуратини илова қилиш зарур. Ариза ЙҲХХ томонидан кўриб чиқилгач, талабгорга тўлов учун инвойс юборилади.

Яроқсиз ҳолга келган, бузилган ёки шикастланган бир жуфт авторақам ўрнига янгисини олиш учун тўлов БҲМнинг 3,5 баравари (1,442 млн сўм) ни ташкил этади.

Тўлов амалга оширилгач, давлат рақами белгиси тайёрланади ва ариза берувчига уни олиб кетиш учун ЙҲХХ бўлинмасига бориш кераклиги ҳақида хабарнома юборилади. Ундан кейин бўлинмага бориб, эски рақамни топшириш ва янги давлат рақами белгисини қабул қилиб олиш мумкин.

Март ойида Узавтомотобелги давлат корхонаси автомобиль рақамларини харид қилиш учун расмий мобил иловани ишга туширганди. У орқали фойдаланувчилар сотувдаги «чиройли» комбинациялар билан танишиши, ўзига маъқул келган рақамни онлайн харид қилиши мумкин.