3 июнь куни шаҳар йўловчи транспорти тизимини такомиллаштириш чора-тадбирлари тўғрисидаги ҳукумат қарори (№276-сон) қабул қилинди. Бу ҳақда Транспорт вазирлиги матбуот хизмати хабар берди.

Унга кўра, ҳайдовчи билан бирга 60 ва ундан ортиқ йўловчини ташишга мўлжалланган, «Евро-5» ва ундан юқори экологик стандартларга мос, М3 тоифадаги (III синфга мансуб бўлмаган) янги автобус, электробус ва троллейбуслар учун имтиёз жорий этилади.

2027 йил 31 декабрга қадар ушбу транспорт воситаларини Ўзбекистонга импорт қилишда утилизация йиғими ноль ставкада қўлланади.

Жорий йил 1-центабрдан бошлаб брутто-шартнома асосида ишлаётган мунтазам шаҳар автобус йўналишларида йўлкира ҳақи автобусга чиқиш вақтида тўланиши шарт бўлади. Бу тушумлар тўлиқлигини таъминлашга қаратилган.

Йўловчи қуйидаги усуллардан фойдаланиши мумкин:

• транспорт картасини автоматлаштирилган тўлов тизими терминаллари (валидаторлар) га теккизган ҳолда уни валидация қилиш;
• банк картаси, смартфон ва бошқа контактсиз электрон тўлов турларидан фойдаланиш (NFC, QR, Biometric, BLE, UWB ва бошқа жорий этилаётган технологиялар ёрдамида тўлаш);
• ижтимоий/транспорт картасини валидаторга теккизган ҳолда имтиёзли ёки бепул юриш ҳуқуқини тасдиқлаш.

Агар йўлкира автобусга чиқиш вақтида тўланмаса ёки тасдиқланмаса, йўловчи автобусда чиптасиз юрган деб ҳисобланади.

Бундан ташқари, ҳужжат билан ҳукуматнинг айрим қарорларига ўзгартиришлар ва қўшимча киритилади. Хусусан, шаҳар четидан 5 кмгача ёки белгиланган тартибда тасдиқланган шаҳарларнинг транспорт ва йўл-транспорт инфратузилмасини ривожлантириш бош режаларига мувофиқ кўпи билан 12 кмгача четга чиқувчи йўналишлар ҳам эндиликда шаҳар автобус йўналишлари ҳисобланади.

Транспорт вазирлиги тегишли вазирлик ва идоралар билан ҳамкорликда 1-центабргача пойтахт жамоат транспорти ва шаҳар атрофи темир йўл қатновларида йўлкирани тўлашнинг интеграциялашган тизимини, шу жумладан, «электропоезд-автобус» ва «электропоезд-метро» жозибадор тариф режаларини жорий қилади.