Ягона портал орқали хавфсизлик камари тақишга тўсқинлик қилувчи касалликларга эга фуқаролар учун тиббий маълумотнома олиш хизмати ишга туширилди.

Эндиликда фуқаролар бунинг учун поликлиникага мурожаат қилиб, қоғоз шаклидаги ҳужжатларни расмийлаштириши шарт эмас. Маълумотномани my.gov.uz портали ёки унинг мобил иловаси орқали юклаб олиш мумкин.

Бунинг учун фойдаланувчи портал ёки иловадаги «Маълумотномалар» бўлимига кириб, тегишли хизмат ни танлаши керак.

Шу билан бирга, маълумотнома автоматик шаклланиши учун фуқаро аввал тиббиёт муассасасида шифокорлар кўригидан ўтган бўлиши лозим. Тиббий хулоса электрон базага киритилгач, ҳужжат порталда шаклланади.

Қайд этилишича, маълумотнома тиббий хулосада кўрсатилган муддат давомида амал қилади. Хизмат бепул кўрсатилади ва қўшимча ҳужжатлар талаб этилмайди.

Жорий йилнинг январида саломатлиги хавфсизлик камари тақиш имконини бермайдиган касалликлар рўйхати Адлия вазирлигида давлат рўйхатидан ўтказилганди. Рўйхатга жами 20 турдаги касаллик ва ҳолатлар киритилган. Қовурғалар синиши, бронхиал астма, оғир юрак-қон томир касалликлари шулар жумласидан.

Спот, аввалроқ, ёш оилалар учун ижара тўловларини қоплаш бўйича онлайн хизмат ишга тушгани ҳақида ёзганди.