Moody’s халқаро рейтинг агентлиги Ўзбекистоннинг суверен кредит рейтингини бир поғонага ошириб, Bа2 даражасида белгилади. Рейтинг прогнози эса “ижобий”дан “барқарор”га ўзгартирилди.

Президент администрацияси раҳбари Саида Мирзиёеванинг таъкидлашича, мазкур натижа Шавкат Мирзиёев раҳбарлигида мамлакат иқтисодий салоҳиятини мустаҳкамлаш борасида олиб борилаётган тизимли ислоҳотлар самарасидир.

Қайд этилишича, рейтингнинг оширилиши Ўзбекистон учун янада қулай шартлардаги инвестицияларни жалб этиш, арзон молиявий ресурслардан фойдаланиш, янги корхоналар очилиши ва қўшимча иш ўринлари яратилишига хизмат қилади.

Moody’s ҳисоботида айтилишича, рейтингнинг оширилишига Ўзбекистонда институционал ва иқтисодий ислоҳотларнинг изчил давом этаётгани ҳамда иқтисодиётнинг тобора диверсификация қилинаётгани асос бўлган. Агентлик сўнгги уч йил давомида мамлакат иқтисодий ўсиши ўртача 6,9 фоизни ташкил этганини, бюджет интизоми кучайгани ва давлат зиммасидаги молиявий мажбуриятларни бошқариш яхшиланганини таъкидлади.

Шунингдек, ҳисоботда энергетика ва газ соҳасини либераллаштириш, мустақил регуляторлар ташкил этилиши, Ўзбекистоннинг Жаҳон савдо ташкилотига аъзо бўлиш жараёни, корпоратив бошқарув ва рақобатни ривожлантиришга қаратилган ислоҳотлар рейтингнинг яхшиланишига ижобий таъсир кўрсатгани қайд этилган. Хусусан, 2026 йил май ойида UzNIF’нинг халқаро фонд бозорларида муваффақиятли дуал листинг ўтказгани инвесторлар ишончи ортаётганининг муҳим белгиси сифатида баҳоланган.

Moody’s прогнозига кўра, Ўзбекистон иқтисодиёти 2026–2027 йилларда ҳам 6,1–6,3 фоиз атрофида ўсишда давом этади ва бу агентлик рейтинг берадиган давлатлар орасидаги энг юқори кўрсаткичлардан бири бўлиб қолади.

Шу билан бирга, агентлик давлат иштироки юқори бўлган корхоналар ва банкларни ислоҳ қилиш, хусусийлаштириш жараёнларини изчил давом эттириш мамлакат кредит рейтингини келгусида янада яхшилаш учун муҳим омил бўлиб қолишини таъкидлаган.

Fitch Ratings халқаро рейтинг агентлиги 2026 йил июнь ойи бошида Ўзбекистоннинг суверен кредит рейтинги бўйича прогнозни “барқарор”дан “ижобий”га яхшилаганди.