Тошкентда Ўзбекистон ва Австрия ишбилармонлари ўртасида бизнес-форум ўтказилди

Форумда энергетика, нефть-кимё саноати, IT соҳаси ва бошқа йўналишларда ҳамкорлик имкониятлари кўриб чиқилди

Австрия ҳукумати ва ишбилармон доиралари делегациясининг Ўзбекистонга ташрифи доирасида Тошкентда Ўзбекистон-Австрия бизнес-форуми бўлиб ўтди. Бу ҳақда Инвестициялар ва ташқи савдо вазирлиги матбуот хизмати хабар берди.

Маълум қилинишича, тадбирда икки мамлакатдан 100 га яқин тадбиркор, савдо-саноат палаталари ва халқаро молия институтлари вакиллари, шунингдек, Ўзбекистон вазирлик, идора ва тармоқ бирлашмалари раҳбарлари иштирок этган.

Фото: Инвестициялар ва ташқи савдо вазирлиги матбуот хизмати

Форумнинг очилиш маросимида Ўзбекистон бош вазири ўринбосари — инвестициялар ва ташқи савдо вазири Сардор Умурзоқов ва Австриянинг Европа ва ташқи ишлар федерал вазири Михаэль Линхарт сўзга чиққан. Икки мамлакат делегациялари раҳбарлари инвестициявий, савдо-иқтисодий соҳаларда муносабатларнинг ишга солинмаган салоҳиятини қайд этиб, ўзбек ва австриялик тадбиркорлар ўртасида шерикликни йўлга қўйиш учун қулай шарт-шароитлар яратиш борасида ўзаро ҳамкорлик қилишга тайёр эканликларини таъкидлаган.

Жумладан, энергетика, нефть-кимё саноати, IT соҳаси, қишлоқ хўжалиги, қурилиш материаллари ишлаб чиқариш ва банк-молия йўналишларида қўшма лойиҳаларни амалга оширишнинг улкан истиқболлари қайд этилган.

Шунингдек, Ўзбекистонда амалга оширилаётган кенг кўламли ижтимоий-иқтисодий ислоҳотларнинг сезиларли натижалари ҳамда уларнинг ортга қайтмаслиги таъкидланган. Миллий иқтисодиётни либераллаштириш ва мамлакатда инвестициявий муҳитни яхшилаш борасидаги изчил чора-тадбирлар туфайли Ўзбекистон билан Австрия ўртасида иқтисодий шерикликни кенгайтириш учун шарт-шароитлар шакллантирилгани маълум қилинган.

Шу билан бирга, Австрия компанияларининг Ўзбекистоннинг кимё, тоғ-кон саноати ва автомобилсозлик соҳаларидаги лойиҳаларни амалга оширишдаги «муваффақият ҳикоялари» ҳам қайд этилган.

Форумда Австрия Федерал Иқтисодиёт палатаси, Австриянинг йирик компаниялари, Ўзбекистоннинг вазирлик, идора ва тармоқ бирлашмалари раҳбарлари ва вакиллари, шунингдек, Европа тикланиш ва тараққиёт банки вакиллари иштирок этган. Ташриф буюрганларга Ўзбекистонда хорижий инвесторлар учун яратилган имтиёзлар тақдимоти ўтказилган. Бизнес-форум давомида «B2B» шаклида учрашувлар ўтказилгани хабарда қўшимча қилинган.

Аввалроқ, Бош вазир ўринбосари Австриянинг Европа ва ташқи ишлар Федерал вазирини қабул қилгани ҳақида хабар берилди. Шунингдек, Европа комиссияси Ўзбекистонга 83 миллион евролик грантлар ажратиши хабар қилинганди.

Koʻrishlar soni: 36