Тошкент шаҳрида 3 ноябрь куни Инвестициялар ва ташқи савдо вазирлиги томонидан ташкил этилган Европа Иттифоқи делегацияси билан биргаликда ривожланиш соҳасида ҳамкорлик масалалари бўйича «Ўзбекистон-ЕИ» кичик қўмитасининг 4 йиғилиши бўлиб ўтди. Бу ҳақда вазирлик матбуот хизмати хабар берди.

Маълум қилинишича, учрашув Европа комиссияси, делегацияси ҳамда Европа Иттифоқигага аъзо давлатларнинг Ўзбекистондаги элчихоналари, шунингдек, алоқадор вазирлик ва идоралар вакиллари иштирокида бўлиб ўтган. Тадбирга инвестициялар ва ташқи савдо вазирининг ўринбосари Шуҳрат Вафоев ва Европа комиссияси департамент бошлиғи Сара Риналди ҳамраислик қилган.

Қайд этилишича, учрашув кун тартибидаги асосий масалалар 2021–2027 йилларга мўлжалланган янги дастур доирасида Европа комиссияси билан икки томонлама молиявий-техникавий ҳамкорлик истиқболлари ва йўналишларидан иборат бўлган.

Хусусан, қишлоқ хўжалигини қўллаб-қувватлаш ва «яшил ўсиш», суд ҳамда транспорт-логистика тизимларининг бошқарув самарадорлигини ошириш ва рақамлаштириш, инвестициявий муҳитни юксалтириш, шунингдек, Оролбўйи минтақасини ижтимоий-иқтисодий ривожлантириш йўналишларида лойиҳа ва тадбирларни амалга ошириш масалаларига тўхталиб ўтилган.

Шунингдек, Европа томони Европа комиссиясининг 2021–2024 йилларда Ўзбекистонга 83 миллион евро миқдорида мақсадли грантлар ажратиш, шунингдек, Оролбўйи минтақасини ривожлантириш мақсадида «Team Europe» ташаббуси доирасида Европа Иттифоқига аъзо давлатлар билан биргаликда молиявий ва техник ҳамкорликни кенгайтириш ниятида эканлигини маълум қилди.

Музокаралар якунида Европа комиссиясининг 2021–2024 йилларга мўлжалланган янги дастури доирасида қўшма ташаббусларни жадаллаштириш ва муваффақиятли амалга ошириш мақсадида яқиндан ҳамкорлик қилишга келишилган.

Аввалроқ Иқтисодиёт вазири ўринбосари Европа Иттифоқи вакиллари билан «яшил» иқтисодиётга ўтишни муҳокама қилгани ҳақида хабар берилганди. Шунингдек, Марказий банк ва МДҲ Молия-банк кенгаши раҳбарияти ўртасида учрашув ўтказилгани хабар қилинди.