Ўзбекистон Молия вазирлиги томонидан барча МҲХС ҳужжатларининг давлат тилига таржимаси якунланди. Бу ҳақда вазирлик матбуот хизмати хабар берди.

Маълум қилинишича, давлат тилига таржима қилинадиган МҲХС ҳужжатлари жами 62 та ҳужжатдан иборат бўлиб, умумий ҳажмда 900 варақда 508 255 та сўздан ташкил топган. Бу 25 та Бухгалтерия ҳисобининг халқаро стандартлари (IAS-International accounting standards), 17 та Молиявий ҳисоботнинг халқаро стандартлари (International Financial Reporting Standards) ва 20 та МҲХСга тушунтиришларни ўз ичига олади.

Кейинги босқичда ўзбек тилига таржима қилинган МҲХС ҳужжатлари бўйича қуйидаги ишлар амалга оширилади:

• Ҳужжатлар матни муҳаррир томонидан таҳрирланади ва МҲХС ҳужжатларини Кўриб чиқиш комиссияси (Комиссия) томонидан кўриб чиқилади ҳамда тегишли ҳулоса олинади;
• Комиссия хулосаси олинган ҳужжатлар тўплами МҲХС Фондига юборилади, ушбу ташкилот томонидан кўриб чиқилади ва ўзининг веб-сайтида (ifrs.org) эълон қилади;
• МҲХС ҳужжатлари Ўзбекистон Республикаси Вазирлар Маҳкамасининг 2020 йил 24 августдаги «Молиявий ҳисоботнинг халқаро стандартлари ва унга тушунтиришлар матнини тан олиш тартиби тўғрисидаги низомни тасдиқлаш ҳақида» қарори асосида қонунчиликка киритиш бўйича экспертлар комиссияси хулосаси олинади ва Молия вазирлигини тегишли буйруғи билан тан олинади.

Қайд этилишича, шу ҳафтада МҲХС ҳужжатларининг бевосита фойдаланувчилари ва жамоатчиликнинг фикрини ўрганиш ва таклифлар олиш (feedback) учун 19-сон Бухгалтерия ҳисобининг халқаро стандарти «Ходимларнинг даромадлари»нинг давлат тилидаги таржимаси лойиҳаси Молия вазирлигининг веб-сайтига жойлаштирилди.

Мазкур МҲХС ҳужжатларини давлат тилидаги таржимаси юзасидан фикр ва мулоҳазаларни ifrs@mf.uz электрон манзилига юбориш мумкин.

Аввалроқ Молия вазирлиги ACCA билан ҳамкорликда сертификатланган бухгалтерлар сонини ошириши ҳақида хабар берилганди.