Бирлашган Миллатлар Ташкилотининг Бутунжаҳон озиқ-овқат дастури (WFP) Илон Маскнинг 6,6 миллиард доллар дунёда очлик муаммосини ҳал қилишга қандай ёрдам бериши бўйича батафсил режа тузиш ҳақидаги илтимосини бажарди. Бу ҳақда дастур ижрочи директори Девид Бисли Twitter’да ёзди.

WFP веб-сайтида «миллиардерларга бир марталик мурожаат» эълон қилинди. Дастур уларни «42 миллион одамни очликдан қутқариш» учун 6,6 миллиард доллар хайрия қилишга чақирди.

Шундан сўг Илон Маск БМТнинг Жаҳон озиқ-овқат дастури (WFP) вакилларидан буни қандай амалга ошириш мумкинлигини тушунтиришни сўради. Маск ўз сўровини Twitter’га жойлаштирди ва ишончли жавоб бўлса, ўзининг Tesla’даги акцияларини сотишга ваъда берди.

«Агар WFP ушбу Twitter саҳифасида 6 миллиард доллар дунёдаги очликни қандай ҳал қилишини аниқ тасвирлаб бера олса, мен ҳозироқ Tesla акцияларини сотаман ва буни амалга ошираман», — деб ёзган Маск.

WFP бош директори Девид Бисли 27 октябрь куни CNN телеканалида миллиардерлар Илон Маск ва Жефф Безосни 6 миллиард доллар хайрия қилиш учун «бир марталик қадам ташлашга» чақирди. Бислининг сўзларига кўра, бундай хайрия «уларга етиб бормаса, том маънода ўладиган» 42 миллион одамни қутқариши мумкин.

Жаҳон озиқ-овқат дастури режасидан кўчирмаларга кўра, энг катта миқдор — 3,5 миллиард долларни озиқ-овқат ва уни тарқатиш учун сарфлаш таклиф қилинмоқда. Шунингдек, 2 миллиард доллар одамлар ўзлари озиқ овқат сотиб олишлари учун ва озиқ-овқат ваучерларига сарфланиши керак.

WFP 43 мамлакатдаги озиқ-овқат дастурларига 700 миллион доллар, маъмурий харажатларга 400 миллион доллар ажратмоқчи. Жаҳон озиқ-овқат дастурининг ҳисоб-китобларига кўра, энг катта молиявий ёрдам Яманга керак. Ундан кейин Жанубий Судан ва Афғонистон, Венесуэла, Покистон ва Сурия ҳам биринчи ўнталикка киради.

Аввалроқ Илон Маск 6 миллиард доллар дунёдаги очликни йўқота олишига шубҳа билдириб, агар бу исботланча, ўзининг Tesla’даги акцияларини сотишга тайёрлигини маълум қилганди.