Дунёдаги очлик, шубҳа ва 6 млрд доллар: Илон Маск Tesla акцияларини сотишга тайёрлигини айтди
Илон Маск Twitter’да БМТнинг Жаҳон озиқ-овқат дастури бош директорига мурожаат йўллади
Дунёнинг энг бой одами, америкалик миллиардер Илон Маск (Forbes Real-Time маълумотларига кўра, бойлиги 292,6 миллиард доллар) 6 миллиард доллар хайрия бутун дунё очлик муаммосини ҳал қилиши мумкинлигига шубҳа қилди. Маск бу ҳақда ўзининг Twitter caҳифасида ёзди.
У БМТнинг Жаҳон озиқ-овқат дастури (WFP) вакилларидан буни қандай амалга ошириш мумкинлигини тушунтиришни сўради. Маск ўз сўровини Twitter’га жойлаштирди ва ишончли жавоб бўлса, ўзининг Tesla’даги акцияларини сотишга ваъда берди.
«Агар WFP ушбу Twitter саҳифасида 6 миллиард доллар дунёдаги очликни қандай ҳал қилишини аниқ тасвирлаб бера олса, мен ҳозироқ Tesla акцияларини сотаман ва буни амалга ошираман», — деб ёзган Маск.
WFP бош директори Девид Бисли 27 октябрь куни CNN телеканалида миллиардерлар Илон Маск ва Жефф Безосни 6 миллиард доллар хайрия қилиш учун «бир марталик қадам ташлашга» чақирди. Бислининг сўзларига кўра, бундай хайрия «уларга етиб бормаса, том маънода ўладиган» 42 миллион одамни қутқариши мумкин.
Аввалроқ Tesla компаниясининг нархи 1 триллион доллардан ошгани ҳақида хабар берилганди. Шунингдек, Илон Маскнинг бойлиги 250 млрд доллардан ошгани маълум бўлди. Кейинчалик Маск миллиардерларга солиқ жорий этиш ғоясини танқид қилди.
