АҚШда яқин 5 йил ичида фуқаролар уруши каби йирик можаронинг бошланиши эҳтимоли 30 фоизни ташкил этади. Бу ҳақда миллиардер ва дунёдаги энг йирик Bridgewater Associates хеж-фонди асосчиси Рэй Далио Forbes журналига берган интервьюсида айтиб ўтди.

«Америка айниқса ҳимоясиз кўринади. Биз буни ҳозир ҳал қилишимиз жуда муҳим», — дейди у АҚШ иштирокида халқаро уруш бошланишини ҳам истисно этмаган ҳолатда.

Forbes’нинг ёзишича, ноябрь ойи охирида чиқадиган янги китобида Далио АҚШнинг ортиб бораётган қарзи ва даромадлар тенгсизлиги Америка таъсирининг пасайиши билан бирга, мамлакатни нафақат иқтисодий қийинчилик, балки уруш хавфи остига қўйганини таъкидлайди.

Хусусан, у ўсиб бораётган қарз ва нолга яқин фоиз ставкаларига ишора қилди. Бу пулни оммавий босиб чиқаришга олиб келган.

«Бу бойлик тафовутининг кенгайиши ва Хитойнинг жаҳон саҳнасида АҚШ гегемонлигига қарши курашиш қобилияти туфайли можаролар ва қутбланишнинг кучайиши каби таҳдидларга замин яратади», — деди Рэй.

Қўшма Штатлар қарз ва даромадлар тенгсизлиги даражасининг ортиб бораётгани, глобал саҳнада куч ва таъсирнинг пасайишига дуч келган биринчи давлат эмас.

Forbes Real-Time рейтингининг 29 ноябрь ҳолатига кўра, Далионинг бойлиги 20 миллиард долларга баҳоланмоқда. Миллиардер 40 нафар энг бой америкалик қаторига киради. Унинг Bridgewater Associates фонди 154 миллиард долларлик активларни бошқаради.

Аввалроқ миллиардер Рубен Варданян сиёсий карьерасини бошлаш режасини эълон қилганди.