Oracle компанияси асосчиси Ларри Эллисоннинг бойлиги бир кунда 15 миллиард доллардан кўпроққа ошди. 10 декабрь куни молиявий ҳисобот эълон қилинганидан кейин миллиардернинг капитали унинг компанияси акциялари ортидан кўтарилиб кетди. Бу ҳақда Forbes ёзмоқда.

Шу тариқа Эллисон Forbes талқини бўйича дунёнинг энг бой бизнесменлари рейтингида Google асосчилари Сергей Брин ва Ларри Пейжни ортда қолдириб, 5-поғонага кўтарилган. Forbes Real-Time маълумотларига кўра, Эллисоннинг бойлиги ҳозирда 135,7 миллиард долларга, Пейж ва Бриннинг бойлиги эса мос равишда 126,3 ҳамда 121,7 миллиард долларга баҳоланмоқда.

Қайд этилишича, Oracle 9 декабрь куни савдолар ёпилгандан кейин 2021 йилнинг иккинчи чораги учун молиявий ҳисоботларни эълон қилган. Унга кўра, техногигантнинг даромади 6 фоизга ўсиб, 10,36 миллиард долларни ташкил этган ва шу тариқа таҳлилчилар кутган прогноз — 10,21 миллиард доллардан ошиб кетган.

Хабарга кўра, миллиардернинг бойлиги Tesla акциялари нархининг ошиши ҳисобига ҳам кўтарилган. Маълум бўлишича, Tesla директорлар кенгаши аъзоси ҳисобланган Элиссон компаниянинг тахминан 15 миллиард долларлик акцияларига эгалик қилади.

Маълумот учун, Ларри Эллисон 1977 йилда Oracle компаниясига асос солган. У 2014 йилда Oracle бошқарув кенгаши раиси ва бош техник директорига айланишдан олдин 37 йил давомида бош директор лавозимида ишлаган. У компаниянинг қарийб 35 фоизига эгалик қилади.

Аввалроқ Африканинг собиқ энг бой аёлига АҚШга кириш тақиқлангани хабар қилинганди.