Африканинг собиқ энг бой аёлига АҚШга кириш тақиқланди
Forbes 2013 йилда Изабель дос Сантосни Африканинг энг бой аёли деб топган.
Америка Қўшма Штатлари Анголанинг собиқ Президентининг СССРда туғилган қизи, 2021 йилнинг январигача Forbes миллиардерлари рўйхатида бўлган Изабель дос Сантосга нисбатан санкциялар жорий қилди. АҚШ Давлат котиби Энтони Блинкеннинг баёнотида айтилишича, «Ангола давлат корхонасининг собиқ раиси»га қарши санкциялар «унинг шахсий мақсадларда давлат маблағларини ўғирлаш йўли билан йирик коррупцияга алоқадорлиги учун» жорий этилган. Бу ҳақда Forbes ёзқмоқда.
Блинкен санкциялар «Магнитский қонуни» доирасида киритилаётганини таъкидлаган. Санкция рўйхатига киритилган шахслар ва уларнинг яқин қариндошларининг АҚШга кириши тақиқланган.
Изабель дос Сантос 1973 йилда Бакуда Жозе Эдуарду дос Сантос оиласида туғилган. Ўша пайтда Жозе Эдуарду Анголани озод қилиш учун халқ ҳаракати фаоли бўлган. Кейинчалик Изабелнинг отаси Анголанинг Президенти бўлди ва 1979 йилдан 2017 йилгача мамлакатни бошқарди.
2013 йилда Forbes Изабель дос Сантосни Африканинг энг бой аёли деб топди, ўшанда унинг бойлиги 3,5 миллиард долларни ташкил қилган. Халқаро тадқиқотчи-журналистлар консорциуми (ICIJ) маълумотларига кўра, дос Сантос ва унинг турмуш ўртоғининг бизнес империяси 400 дан ортиқ компанияларни ўз ичига олган. Ўша компаниялар Ангола ҳукумати орқали миллиардлаб доллар шартномаларни қўлга киритган.
Изабелнинг отаси, яъни Ангола Президенти истеъфога чиққанидан кейин мамлакатда унга қарши тергов бошланди. Африканинг энг бадавлат аёли давлатга қарашли Sonangol нефть компаниясининг раҳбари бўлиб ишлаган вақтида пул ўмариш ва пул ювишда айбланган. Ўз навбатида, тадбиркор бу айбловларни рад этган. 2019 йил охирида Ангола ва Португалияда дос Сантос ва унинг эрининг активларига блок қўйилди (2020 йил ноябрь ойида эри вафот этди).
2021 йил бошида Изабель дос Сантос миллиардерлар рейтингидан чиқиб кетди — Forbes дос Сантоснинг молиявий ҳолатини 1 миллиард доллардан кам, деб баҳолади.
Блинкен бир вақтнинг ўзида Колумбия, Гватемала, Никарагуа, Сальвадор, Либерия, Ангола ва Украинанинг ҳам бир неча фуқаросига нисбатан санкциялар қўлланилишини эълон қилди. Украиналик Александр Тупицкий «жиддий коррупция ҳаракатлари, жумладан, Украина суд тизимида хизмат қилаётган вақтида пора олгани учун» рўйхатга киритилган. Бироқ Тупицкий Украинанинг Конституциявий суди сайтида ҳали ҳам раис сифатида рўйхатда турибди.
Блинкен ўз баёнотида Қўшма Штатлар Халқаро коррупцияга қарши кураш куни — 9 декабрь муносабати билан «коррупцияга қарши кураш бўйича қўшимча дадил чоралар» кўраётгани ва шу билан миллий хавфсизликнинг устувор йўналиши сифатида коррупцияга қарши курашнинг ролини оширишга содиқлигини яна бир бор тасдиқлаётганини қайд этган.