13 декабрь куни эрталабки савдоларда турк валютаси бир доллар учун 14,99 лирагача пасайди ва бу янги антирекордга айланди. Бу ҳақда «Коммерсантъ» хабар берди.
Қайд этилишича, турк лирасининг қадрсизланиши мамлакат Марказий банкининг навбатдаги йиғилиши арафасида содир бўлган. Тошкент вақти билан соат 13:00 га келиб эса турк валютаси бир доллар учун 14,35 лирагача мустаҳкамланган.
Маълумот ўрнида, йил бошидан буён лиранинг долларга нисбатан курси деярли икки баравар, ноябрь ойида эса 26 фоизга пасайган. Лиранинг тушишига асосий сабаб инфляция тезлашишига қарамай (ноябрда у 20 фоиздан ошди) асосий ставкани камайтиришни талаб қилаётган Президент Ражаб Тойиб Эрдоғаннинг позицияси бўлиб қолмоқда. Мамлакат Молия вазирлигининг собиқ раҳбари Лутфий Элъван лиранинг қадрсизланиши фонида истеъфога чиқди.
Аввалроқ, 3 декабрь кунги савдоларда турк валютаси бир доллар учун 13,89 лирагача пасайгани хабар қилинганди.
