Ўзбекистонда мигрантларнинг даромадлари икки томонлама солиққа тортилмаслигини белгиловчи қонун лойиҳаси депутатлар томонидан муҳокама қилинмоқда. Бу ҳақда Олий Мажлис Қонунчилик палатаси депутати Расул Кушербоев хабар берди.

Маълум қилинишича, «Ташқи меҳнат миграцияси тўғрисида»ги қонун лойиҳаси депутатлар томонидан биринчи ўқишда қабул қилинган. Қонун лойиҳасининг мақсади ташқи меҳнат миграцияси соҳасидаги муносабатларни қонун даражасида мустаҳкамлашдан иборат.

Шунингедк, халқаро ҳужжатлардаги қоидаларнинг, хусусан, мажбурий меҳнатга, мигрантларнинг соғлиғига зиён етказувчи шароитларда ишлаш учун жалб этишга йўл қўймаслик каби қоидаларни миллий қонунга имплементация қилиш кўзда тутилган.

Бундан ташқари, ташқи меҳнат миграцияси соҳасидаги давлат органлари ва нодавлат нотижорат ташкилотларининг ваколатларини белгилаш қонуннинг асосий мақсадидан ҳисобланади. Шу билан бирга, фуқароларнинг мамлакат ташқарисидаги фаолиятини ташкил этиш, уларни уюшган ҳолда ишга жойлаштириш ҳамда чет эллик фуқароларни Ўзбекистонда меҳнат қилиш учун жалб этишнинг ҳуқуқий механизмларини белгилаш ҳам қонун мақсадлари сирасидан ўрин олган.

Таъкидланишича, қонун лойиҳасида меҳнат мигрантларининг даромадлари икки томонлама солиққа тортилмаслиги белгиланмоқда. Қайд этилишича, мазкур мазмундаги қонунни қабул қилиш бир қатор сиёсий партиялар, шу жумладан ЎзЛиДеПнинг сайловолди платформасида ҳам белгиланган.

Шунингдек, қонун лойиҳасида ҳукумат ва ваколатли давлат органларига меҳнат мигрантлари ва уларнинг оила аъзоларини ижтимоий қўллаб-қувватлаш, шароитларини яхшилаш борасида чоралар кўриш вазифаси юклатилмоқда.

Аввалроқ Ўзбекистонлик меҳнат мигрантлари маълумотларининг махфийлиги таъминланиши хабар қилинганди. Шунингдек, Марказий банк меҳнат мигрантлари молиявий саводхонлигини ошириш лойиҳасини ишга туширгани ҳақида хабар берилди.