Туркия Марказий банки 16 декабрь куни тўртинчи марта кетма-кет фоиз ставкаларини пасайтиргани ва турк лирасининг долларга нисбатан тарихий минимумга тушиб қолганидан сўнг, пул-кредит юмшатиш циклини якунлаётганини маълум қилди. Бу ҳақда Bloomberg регуляторнинг пул-кредит сиёсати қўмитасининг баёнотига таяниб хабар берди.

Қайд этилишича, Туркия Марказий банки ҳафталик репо аукционларидаги фоиз ставкасини 15 фоиздан 14 фоизгача пасайтирган, айни пайтда, қолган ставкалар ўзгаришсиз қолдирилган. Шундан сўнг турк лираси 5,6 фоизга тушиб кетган ва долларга нисбатан рекорд даражада пасайиб, 1 долларга 15,689 турк лирасини ташкил қилган. Шу билан бирга, 16 декабрдаги ставканинг пасайиши кетма-кет тўртинчиси бўлган.

InTouch Capital Markets таҳлилчиси Петр Матиснинг айтишича, Туркия Марказий банкининг юмшатиш даврини тўхтатишига сармоядорларнинг ишончи комил эмас.

«Бозор Марказий банк ҳақиқатан ҳам ставкаларни пасайтиришдан ўзини тия оладими ёки йўқлигини тўғри баҳолаши учун Президент Эрдўғоннинг баёнотлари муҳим», — дейди у.

Хабарга кўра, 2019 йил ўрталаридан бери Туркия Президенти Марказий банк раҳбарларини уч марта ишдан бўшатган. Бу ҳолат охирги марта март ойида содир бўлган, ўшанда регулятор асосий ставкани 2 фоиз пунктга — 17 фоиздан 19 фоизга оширган. Янги раҳбарият остида Туркия Марказий банки 2021 йилнинг сентябрь ойида асосий ставкани 18 фоизга, октябрда 16 фоизга, ноябрда 15 фоизга туширган.

Bloomberg’нинг таъкидлашича, турк лираси 2021 йилда ўз қийматининг ярмини йўқотган. Шу билан бирга, истеъмол нархларининг йиллик ўсиши ноябрь ойида 21,3 фоизгача тезлашган. Келгуси 12 ой учун инфляция кутилмалари 15,61 фоиздан 21,39 фоизгача кўтарилган, дея таъкидлайди агентлик Марказий банк томонидан декабрь ойида бозор иштирокчилари ўртасида ўтказилган сўров маълумотларига таяниб.

Аммо Туркия Президенти Ражаб Тоййиб Эрдўғон юқори ставка инфляцияни ушлаб туриш ўрнига унинг янада ошишига сабаб бўлмоқда, деган ноодатий тушунчага эга. У ноябрь ойи ўрталарида Туркияни юқори фоиз ставкалари оқибатидан қутқариб қолишга ваъда берган эди.

Аввалроқ турк лирасининг қадри тарихий минимумни янгилагани хабар қилинганди.