Илон Маск Тесла акцияларининг 10 фоизини сотиш режасини амалга ошириш учун «этарлича акцияларни» сотганини айтди. Бу ҳақда Reuters хабар берди. 

Маълум қилинишича, Илон Маск 6 ноябрь куни Twitter фойдаланувчилари ёқлаб овоз берган тақдирда ўз улушларининг 10 фоизини сотишини эълон қилганидан кейин Tesla акциялари ўз қийматининг чорак қисмини йўқотган. Уч кундан сўнг Маск яна 583 минг 611 та акцияни сотиб, у сотган акцияларининг умумий сонини 13,5 миллионга етказган. Бу эса режалаштирилган миқдорнинг 80 фоизини ташкил қилади. 

«Мен опционларни амалга оширишга 10 фоиз кўпроқ имкониятни қўлга киритиш учун ‘етарлича’ акцияларни сотдим ва иложи борича тўғрисўз бўлишга ҳаракат қилдим», — деган Маск. 

Twitter сўрови туфайли акцияларни сотдими, деган саволга миллиардер нима бўлишидан қатъи назар муддати 2022 йилда тугайдиган акция опционларидан фойдаланиши керак бўлганини айтган. Маск 10 фоизга яқин даромад олиш учун «қўшимча акцияларни» сотганини таъкидлаган. 

Қайд этилишича, 13,5 миллион акциядан 8,06 миллиони унинг опционларини амалга ошириш билан боғлиқ солиқларни тўлаш учун сотилган. Маск Twitter’да бу йил 11 миллиард доллардан ортиқ солиқ тўлашини айтган. 

«Калифорния илгари имкониятлар жойи бўлган, аммо ҳозир у борган сари кўпроқ тартибга солиш, ортиқча суд жараёни ва ортиқча солиққа тортиш жойига айланмоқда», — деган Маск. 

Шунингдек, у Калифорнияда натижаларга эришиш қийинроқ бўлиб бораётганини қўшимча қилган. 

Аввалроқ АҚШда Tesla’га нисбатан текширув бошлангани хабар қилинганди. Шунингдек, Илон Маскнинг бойлиги бир ҳафтада 20 миллиард долларга камайгани ҳақида хабар берилди.