Илон Маскнинг бойлиги бир ҳафтада 20 млрд долларга камайди
Миллиардернинг маблағ йўқотишига Tesla акцияларининг тушиши сабаб бўлди.
Америкалик бизнесмен Илон Маскнинг бойлиги бир ҳафтада 20 млрд долларга камайди. Бу ҳақда Forbes хабар берди.
Маълум қилинишича, Илон Маскнинг бойлиги Tesla акциялари нархи тушиб кетиши туфайли бир ҳафтада 20 миллиард доллардан кўпроққа — 245,1 миллиард долларгача қисқарган. Компания жами Америка бозоридаги вазиятдан ҳам ёмонроқ натижа қайд этган.
Нашрнинг ёзишича, 10 ва 17 декабрь кунлари савдолар ёпилиши оралиғида Маскнинг капитали тахминан 20,3 миллиард долларга қисқарган. Сабаби худди шу даврда Tesla акциялари 8,3 фоизга камайган эди.
Қайд этилишича, Tesla бутун бозордан орқада қолган. S&P 500 бу ҳафта 1,9 фоизга тушган ва Dow Jones саноат индекси 1,7 фоизга камайган. Бунга қисман АҚШда коронавируснинг янги «омикрон» штамми пайдо бўлиши ва 2022 йилда фоиз ставкаларининг эҳтимолий ўсиши кутилаётгани сабаб бўлган.
Маълумотларга кўра, ноябрь ойи бошидан бери Маск Tesla акцияларини компания опционлари олинганда тўланиши керак бўлган солиқларни қоплаш учун сотмоқда. Бу вақт ичида Маск 14 миллиард долларга яқин қимматли қоғозларни сотган.
Маълумот учун, 13 декабрь куни Илон Маск Time журнали томонидан «Йил одами» деб топилганди. Шундан сўнг Буюк Британиянинг дунёга машҳур Financial Times газетаси ҳам Tesla раҳбари Илон Маскни электромобиллар саноатида қилган ишлари учун «Йил одами» деб топди.
