АҚШнинг Қимматли қоғозлар ва биржалар комиссияси (SEC) Tesla’нинг собиқ ходими Стивен Хенкеснинг шикоятидан сўнг, компанияга нисбатан текширувни бошлади. Бу ҳақда Reuters хабар берди.

Қайд этилишича, Tesla бир неча йил давомида ўз акциядорлари ва жамоатчиликни қуёш панелларидаги нуқсонлар билан боғлиқ ёнғин хавфидан огоҳлантирмаган.

Nasdaq биржаси маълумотларига кўра, АҚШда савдолар бошланганидан кейин Tesla акциялари 4 фоиздан кўпроққа тушиб кетган. Статистикага кўра, ҳар бир акциянинг нархи 950,5 долларгача пасайган. Бу 25 октабрдан кейин кузатилган энг паст кўрсаткичдир. Ўз навбатида, Tesla бош директори Илон Маскнинг бойлиги деярли 10 миллиард долларга камайган.

Таҳлилчиларнинг фикрига кўра, акциялар нархининг пасайиши компанияга нисбатан бошланган текширув билан боғлиқ.

SEC ҳозирча Tesla томонидан қонун бузулиши ҳолатини тасдиқламаган. Компания вакиллари ҳам ушбу хабарни изоҳлашдан бош тортган.

Маълумот ўрнида, Хенкес Tesla’нинг сифат назорати бўлимида ишлаган ва 2020 йилда ишдан бўшатилган. Reuters нашрига кўра, Хенкес хавфсизлик масалаларини кўтаргани учун жазо сифатида ишдан бўшатилган.

2019 йилда Walmart супермаркетлар тармоғи АҚШда қуёш панеллари ёниб кетиши ортидан Tesla устидан судга мурожаат қилган. Даъво аризасида келтирилишича, Tesla томонидан ўрнатилган қуёш панелларининг аккумуляторлари ёниб кетган. Оқибатда Walmart супермаркетлар тармоғининг 7 та дўкони зарар кўрган. Ўша йилнинг август ойида, Walmart’дан кейин Amazon компанияси ҳам қуёш панелларининг ёниб кетиши бўйича шикоят қилган.

2019 йилда Business Insider нашри Tesla 2018 йилда носоз қуёш панелларини алмаштириш учун Project Titan дастурини яширинча ишга туширганини ёзган. CNBC хабарига кўра, Ҳенкеснинг шикоятидан кейин АҚШ Истеъмол маҳсулотлари хавфсизлиги комиссияси Tesla устидан текширув олиб бормоқда.

Маълумот ўзрнида, Tesla дунёдаги энг қиммат автомобиль ишлаб чиқарувчиси бўлиб, 2021 йилда компания капиталлашуви биринчи марта 1 триллион доллардан, ҳар бир акция қиймати эса 1200 доллардан ошди. Жорий йилнинг ноябрь ва декабрь ойларида нарх яна 1000 доллардан пастга тушди.

Аввалроқ Европа космик агентлиги Илон Маскнинг устидан шикоят қилгани ҳақида хабар қилинганди.