Павел Дуровнинг Telegram каналидаги постидан кейин Toncoin деярли 50 фоизга қимматлашди. Бу ҳақда Forbes хабар берди.

Маълум қилинишича, Дуровнинг TON блокчейн лойиҳаси қулаганидан сўнг яратилган Toncoin криптовалютаси нархи деярли 50 фоизга кўтарилган. У ўзининг Telegram каналида криптовалюта ижодкорларига муваффақият тилаган постини эълон қилганидан сўнг Toncoin нархи тез ўсишни бошлаган.

«Telegram кодлаш танловлари чемпионларининг Toncoin деб номлаган очиқ кодли TON лойиҳасини ишлаб чиқишда давом этаётгани мени илҳомлантирди. Биз яратган технология тирик экани ва ривожланаётганидан фахрланаман», — деб ёзган у.

Дуров TON ҳали ҳамон блокчейн соҳасида олдинда эканини таъкидлаган ва Toncoin жамоасига муваффақият тилаган. «Тўғри бозорга чиқиш стратегияси билан биргаликда улар тилларда достон бўладиган кашфиётларни яратиш учун зарур бўлган нарсага эга», деб ёзган Telegram раҳбари. Шу билан бирга, у Telegram компаниясининг Toncoin билан ҳеч қандай алоқаси йўқлигини таъкидлаган.

Қайд этилишича, 2018 йил бошида Telegram TON блокчейн платформаси ва Gram криптовалютасини яратиш учун 1,7 миллиард доллар сармоя жалб қилган. Лойиҳага бутун дунёдан 170 дан ортиқ инвестор, жумладан миллиардерлар Роман Абрамович ва Юрий Мильнер, Qiwi асосчиси Сергей Солонин, бизнесмен Саид Гуцериев, «Вимм-Билль-Данн» асосчиси Давид Якобашвили ва бошқалар сармоя киритган.

Маълумот ўрнида, платформани 2019 йил октябрь охиригача ишга тушириш режалаштирилган эди, аммо АҚШ Қимматли қоғозлар комиссияси (SEC) Gram криптовалютасини қимматли қоғоз сифатида тан олган ва унинг чиқарилишини тақиқлаганди. 2020 йил май ойида Павел Дуров лойиҳа ёпилганини расман эълон қилган.

Аввалроқ Дуровнинг Telegram 2021 йилда энг тез ривожланаётган мобил иловага айланганини айтгани хабар қилинганди. Шунингдек, Европада банк илк бор мижозларига криптовалютага сармоя киритишни таклиф қилгани ҳақида хабар берилди.