Европада банк илк бор мижозларига криптовалютага сармоя киритишни таклиф қилди
BBVA Switzerland мижозлари 21 июнда биткоинни сотиб олиш, сотиш ва сақлаш имконига эга бўлган.
Европада банк тарихда илк бор ўз мижозларига криптовалютага сармоя киритишни таклиф қилди. Бу ҳақда РБК хабар берди.
Қайд этилишича, BBVA Switzerland ўз мижозларига Ethereum’га сармоя киритиш имкониятини яратган. Банкнинг Швейцариядаги бўлими ўз маълумотларига таяниб Европада ҳали ҳеч қайси банк альткоин билан муомаланинг бундай хизматини йўлга қўймаганини таъкидлаган.
Хабарга кўра, банкнинг электрон дастурида Ethereum’ни автоматик равишда евро ёки долларга алмаштириш мумкин. BBVA Switzerland мижозлар талабидан келиб чиққан ҳолда криптовалюта хизматини такомиллаштиришни режа қилган.
Таъкидланишича, банк мижозлари 21 июнда биткоинни сотиб олиш, сотиш ва сақлаш имконини қўлга киритган. Шунингдек, BBVA (Banco Bilbao Vizcaya Argentaria) — Испиниянинг 856 миллиард активга эга энг йирик банкларидан биридир. Банк Туркия, Перу, Венесуэла, Колумбия, Швейцария ва бошқа давлатларда фаолият олиб боради.
Аввалроқ Visa криптовалюталар бўйича консалтинг хизматини йўлга қўйгани хабар қилинганди. Шунингдек, Сальвадорда дунёдаги илк криптовалюта шаҳри қурилиши ҳақида хабар берилди.
