Telegram асосчиси Павел Дуров ўзининг инглиз тилидаги расмий каналида мессенжернинг муваффақияти ҳақида ёзди.

Қайд этилишича, App Annie томонидан тузилган Top Breakout Chart рейтингига кўра, Telegram бу йил энг тез ривожланаётган мобил илова, деб топилган. Бу Дуров мессенжеридаги фаол фойдаланувчилар сони дунёдаги бошқа мобил иловаларга қараганда тезроқ ўсиб бораётганини билдиради.

«2021 йил одамлар очкўз корпорацияларнинг ҳурматсизлигидан чарчаган ва Telegram махфийлиги ҳамда доимийлигини танлаган йил сифатида эсда қолади», — дея таъкидлайди Дуров.

Шунингдек, тадбиркор ўз жамоаси билан мессенжернинг янги функциялари устида ишлашда давом этишга ваъда берган.

Аввалроқ Telegram’нинг янги версиясида «контентни ҳимоя қилиш» бўйича канал муаллифлари учун янги функциялар пайдо бўлгани хабар қилинганди.