Ўзбекистонда бир қатор вазирлик ва ташкилотлар томонидан давлат харидларини амалга оширишда коррупцион ҳолатлар аниқланди. Бу ҳақда Коррупцияга қарши курашиш агентлиги матбуот хизмати хабар берди.

Маълум қилинишича, агентлик томонидан бир қатор давлат идоралари ўтказган давлат харидларида қонун бузилиши ҳолатларига йўл қўйилгани аниқланган. Шунингдек, тегишли вазирлик ҳамда ташкилотларга давлат харидларини бекор қилиш ва қонун бузилиши ҳолатларини бартараф этиш юзасидан тақдимномалар киритилган.

Жумладан, Халқ таълими вазирлиги қошидаги Инновация, технология ва стратегия маркази Давлат унитар корхонаси буюртмачилигида қиймати 3,7 миллиард сўмлик «компьютер тизимига махсус ускуналар» олиш учун берилган эълон юзасидан ўтказилган тендер жараёнида аффилланганлик ҳолатига йўл қўйилганлиги аниқланган. Тендерни бекор қилиш юзасидан Халқ таълими вазирлигига тақдимнома киритилган.

Шунингдек, «Давлат харидлари тўғрисида»ги қонун талабларининг бузилиши ҳолати Қаюм Собирович Зоиров номидаги Ўзбекистон Соғлиқни сақлаш музейининг маъмурий биносини (765 миллион сўмлик) жорий таъмирлаш бўйича ўтказилган давлат харидлари жараёнида ҳам йўл қўйилганлиги аниқланган. Соғлиқни сақлаш вазирлигига мазкур харидларни бекор қилиш юзасидан тақдимнома киритилган.

Бундан ташқари, агентлик томонидан Соғлиқни сақлаш тизимидаги бюджет буюртмачилари томонидан махсус ахборот порталида жойлаштирилган аутсорсинг хизматларини ташкил этишга оид эълонларнинг «Давлат харидлари тўғрисида»ги қонунга мувофиқлиги масофавий мониторинг тартибида ва ҳудудларга чиққан ҳолда ўрганилиб, таҳлил қилинган.

Ўрганишда Молия вазирлиги ва Давлат солиқ қўмитасидан олинган маълумотлар ҳамда «dxarid.uz» махсус ахборот порталида жойлаштирилган маълумотлар таҳлил қилинган. Натижада соғлиқни сақлаш тизимида аутсорсинг хизматларини ташкил этишда бюджет буюртмачилари (тиббиёт муассасалари) томонидан манфаатлар тўқнашувини юзага келтирувчи коррупциявий омилларнинг келиб чиқишига шарт-шароит яратилаётгани аниқланган.

Ҳолат юзасидан Соғлиқни сақлаш ва Молия вазирлигига бу каби қонун бузилиши ҳолатларини бартараф қилиш юзасидан тақдимномалар киритилган. Шу билан бирга, агентлик томонидан Қашқадарё вилоятида соғлиқни сақлаш муассасалари томонидан тиббий ускуналар харид қилинишининг қонунийлиги ўрганилган.

Ўрганиш натижасида, 2020 йил ва 2021 йилнинг 1-ярим йили давомида 10 та тиббиёт муассасалари томонидан 75 дона жами 7 миллиард 817,6 миллион сўмлик тиббий ускуналар Қарши шаҳридаги масъулияти чекланган жамиятдан шартнома асосида 2 миллиард 613 миллион 334 минг 899 сўмга жуда қиммат нархларда бюджет маблағлари ҳисобига сотиб олинганлиги аниқланган.

Мазкур ҳолат юзасидан Бош прокуратура ҳузуридаги Иқтисодий жиноятларга қарши курашиш департаменти Қашқадарё вилояти бошқармаси томонидан 2021 йил 16 декабрь куни таъминотчи жамият ва Қашқадарёдаги 9 та тиббиёт муассасалари мансабдор шахсларига нисбатан жиноят иши қўзғатилган. Прокуратура томонидан тергов ҳаракатлари олиб борилмоқда.

Шунингдек, агентлик томонидан «Обод қишлоқ» дастури доирасида Шаҳрисабз туманидаги «Мевазор» ва «Ўртақўрғон» маҳаллаларида пиёдалар йўлаги қуриш ва тунги ёритиш чироқларини ўрнатиш бўйича пудратчи жамият томонидан амалга оширилган ишлар ўрганилган. Натижада 67,0 миллион сўмлик ҳақиқатда бажарилмаган ишлар бажарилган деб қўшиб ёзилганлиги аниқланган.

Тўпланган ҳужжатлар қонуний қарор қабул қилиш учун Бош прокуратура ҳузуридаги Иқтисодий жиноятларга қарши курашиш департаменти Қашқадарё вилояти бошқармасига юборилган. Бошқарма томонидан 2021 йил 9 декабрь куни Шаҳрисабз тумани ободонлаштириш бошқармаси мансабдор шахслари ва пудратчи жамиятга нисбатан жиноят иши қўзғатилиб, прокуратура томонидан тергов ҳаракатлари олиб борилмоқда.

Аввалроқ Фарғонада йил бошидан бери деярли 7 миллиард сўмлик электр энергияси ўғирлангани хабар қилинганди. Шунингдек, Ўзбекистонда бюджет интизомини бузиш ва асоссиз харажатларни амалга ошириш 2,7 бараварга ошгани ҳақида хабар берилди.