Украинадаги вазият Россия миллий валютаси — рублни кескин қадрсизлантириб юборди. Бироқ ушбу омил Ўзбекистон миллий валютаси — сўмга таъсир қилмаяпти. Зеро, Россия Ўзбекистоннинг ҳам иқтисодий, ҳам молиявий жиҳатдан энг йирик ҳамкорларидан бири ҳисобланади.

Иқтисодчи Отабек Бакировнинг тушунтиришича, Ўзбекистон сўмининг барқарорлиги фақат рублга боғлиқ эмас.

«Қрим босиб олинган вақтдагидан (2014 йил) фарқли ўлароқ бугунги валюта режими миқёс жиҳатдан ҳам, рискларни бошқариш нуқтаи назардан ҳам ва энг асосийси, профессионал қарорлар билан ҳам кескин фарқланади», — дейди иқтисодчи.

Қайд этилишича, сўмнинг барқарорлиги энг аввало ички омилларга, макрокўрсаткичларга боғлиқ.

«Барча ташқи омиллар, биз глобал валюта ва молия бозорига юқори даражада интеграциялашмаганимиз учун, ўз кучини йўқотиб бориш эффекти билан таъсир кўрсатади», — дейди у.

Такъидланишича, бугун ҳам гарчи ташқи глобал платформаларда кескин ўзгарувчанлик кузатилаётган бўлса-да, сўм билан боғлиқ битимлар ва котировкаларда жиддий тебранишлар юз бергани йўқ. Биржа ва банкларда курс барқарор қолмоқда.

«Ҳар бир ваҳима, айниқса унинг ижтимоийлашувига уринишлар, аввало ўзингизнинг шахсий иқтисодий аҳволингиз ва молиявий барқарорлигингизга хавф солади. Эсда тутинг, шошилинч қарорлардан фақат ютқазасиз», — дейди у.

Шунингдек, иқтисодчи Абдулла Абдуқодиров Шарқий Европадаги ҳарбий ҳаракатларнинг Россия учун оқибатлари Ўзбекистон иқтисодиётига қандай таъсир қилиши ҳақида фикр юритган.

«Ватандошларимиз юборадиган доллар ёмғири кескин камая бошлайди. Чунки баъзилар айнан уруш худудида эди (Краснодар ўлкаси, Ставрополь ўлкаси, Ростов вилояти), қолганлар эса долларга ўгирганда камроқ пул топади, харажатлари кўпаяди, баъзилар эса ишсиз қолиши мумкин», — дейди у.

Бундан ташқари, транспорт-логистика нархи кескин кўтарилади. Савдо оборотлари моддий ҳажми қисқариб, нархлари ортиб боради.

«Ким Россияга йил бошида экспорт қилиш бўйича шартномаларни рублда тузган бўлса, у катта касодга учрайди. Импорт шартномалари ҳам тезда қайта кўриб чиқилади», — дейди иқтисодчи.

Қайд этиш керакки, Ўзбекистон тижорат банкларида 22 февраль куни доллар курси рекорд даражада кўтарилган бўлса-да, ундан кейинги кунларда Марказий банк доллар курси кетма-кет иккки марта пасайганини маълум қилди.

Аввалроқ Россия Украина чегарасида ҳарбий операция бошлаганидан сўнг рубль кескин тушиб кетгани хабар қилинганди. Шундан сўнг, Россия Марказий банки Украинадаги операциялар фонида валюта бозорига интервенция бошлагани ҳақида хабар берилди.

Айни вақтда Россия миллий валютасининг қадрсизланиш тезлиги пасайган, бундан ташқари куннинг биринчи қисмида ёпилган Россия фонд биржаси куннинг иккинчи ярмига келиб, фаолиятини қайт тиклади.