Россия Марказий банки Украинадаги операциялар фонида валюта бозорига интервенция бошлади
Рубль қулаши секинлашиб, Россия фонд бозори фаолиятини қайта тиклади.
Россия банки 24 февралдан бошлаб молия бозоридаги вазиятни барқарорлаштириш учун валюта интервенцияларини амалга оширишни бошлади. Бу ҳақда Россия Марказий банки хабар берди.
Қайд этилишича, регулятор бозорга чет эл валютасини етказиб беради, бу хорижий валютага бўлган талабни қондириши ва рублга босимни юмшатиши керак. Россия Банки 2014 йил декабрь ойидан бери ўз валюта интервенцияларини амалга оширмаганди.
24 февраль куни Москва биржасининг эрталабки сессияси очилишидан сўнг доллар курси ўтган куннинг ёпилишига нисбатан 6,55 фоизга ошиб, 84,07 рублни ташкил қилди. Евро сессия очилишида 95,2 рублдан ошди.
Донбассдаги ҳарбий операциялар фонида Россия валютасининг қулаши давом этди. Форекс бозорида доллар курси деярли 90 рублга, евро курси — 99,5 рублга етган.
Орадан бироз вақт ўтгач, Марказий банк интервенциялар тўғрисида эълон қилганидан сўнг, валюта бозоридаги пасайиш секинлашди — доллар 86,2 рубль, евро эса 96,8 рублни ташкил қилмоқда. Россия фонд бозори ҳам фаолиятини тиклади.
