ЕТТБ делегацияси Марказий банк раҳбарияти билан пул бозорининг ривожланишини муҳокама қилди. Бу ҳақда банк матбуот хизмати хабар берди.

Маълум қилинишича, Европа тикланиш ва тараққиёт банкининг (ЕТТБ) Ғазначилик директори Аксел ван Недервен бошчилигидаги делегацияси Марказий банкка ташриф буюриб, регулятор раҳбарияти билан учрашув ўтказган.

Мулоқот чоғида томонлар Марказий банк ва ЕТТБ вакилларидан иборат бўлган пул бозорини ривожлантиришда ҳамкорлик қилаётган ишчи гуруҳ фаолиятини муҳокама қилди.

Марказий банк раҳбарияти ЕТТБ томонидан ликвидликни прогнозлаш ва бошқариш бўйича кўрсатилган техник ёрдам регуляторнинг ушбу соҳадаги фаолиятини яхшилаганини таъкидлади.

Томонлар амалга оширилаётган пул-кредит операциялари самарадорлигини ошириш юзасидан фикр алмашди ва икки томонлама ҳамкорликнинг кейинги истиқболларини белгилаб олди.

Аввалроқ Ўзбекистон банкларининг пул бозоридаги фаоллиги бир йил олдинги кўрсаткичдан тушиб кетгани хабар қилинганди. Шунингдек, Ўзбекистоннинг рақамли валютаси босқичма-босқич ишлаб чиқилиши ҳақида хабар берилди.