Ўзбекистон банкларининг пул бозоридаги фаоллиги январь ойида бир йил олдинги кўрсаткичлардан паст бўлди. Бу ҳақда Марказий банкнинг банклараро пул бозори шарҳида маълум қилинди.

Маълумотларга кўра, банклараро пул бозоридаги умумий ликвидлик ҳолати 2022 йилнинг январь ойида банкларнинг пул бозоридаги фаоллиги 2021 йил декабрь ойига нисбатан ортган бўлсада, 2021 йилнинг январь ойидаги кўрсаткичлардан паст бўлган.

Қайд этилишича, бозордаги динамика йил бошида ҳукумат харажатларининг мавсумий камайиши, муомаладаги нақд пул миқдорининг камайиши ва Марказий банкнинг ички валюта бозорига интервенциялари ҳажмининг ортиши ҳисобига банк тизими умумий ликвидлигининг нисбатан мувозанатлашуви фонида шаклланган.

Бунда, ўртача тортилган фоиз ставкалар ҳам сўнгги ойлардаги каби ўзгаришсиз сақланиб қолиб, асосий ставка ва асосий ставка фоиз коридорининг қуйи чегараси оралиғида шаклланган.

Таъкидланишича, январь ойида ҳам банк тизими ликвидлигида аввалги ойлардаги каби таркибий профицит (ижобий тафовут) сақланиб қолган ва ўрта ҳисобда 2,2 триллион сўмни ташкил этган.

Хабарга кўра, ликвидликни оширувчи омиллар қуйидагилардан иборат:

• ишлаб чиқарувчилар билан олтин хариди билан боғлиқ операциялар — 5,6 триллион сўм;
• муомаладаги нақд пулларнинг банк тизимига қайтиши — 2,1 триллион сўм.

Шунингдек, ликвидликни камайтирувчи омиллар:

• ички валюта бозорига интервенциялар — 8,1 триллион сўм, бунда ички валюта бозорига интервенциялар ўтган йилларда йиғилиб қолган маблағлар ҳисобига ҳам қўшимча равишда амалга оширилган;
• йилнинг дастлабки ойларида ҳукумат операцияларининг мавсумий камайтирувчи таъсири — 2,5 триллион сўм;
• банк тизимида депозитлар базаси ошиб боришига мутаносиб тарзда мажбурий захираларни шакллантирилиши — 97 миллиард сўм.

Аввалроқ Ўзбекистонга январь ойи қанча трансчегаравий пул кириб келгани хабар қилинганди. Шунингдек, Ўзбекистондаги банкларнинг рейтинги эълон қилингани ҳақида хабар берилди.