АҚШ россиялик 12 нафар депутат ва президент матбуот котиби Дмитрий Песковнинг қариндошларига қарши санкциялар жорий қилди. Бу ҳақда мамлакат молия вазирлиги хабар берди.
АҚШ Песковнинг рафиқаси Татьяна Навка ва унинг вояга етган фарзандлари Елизавета Пескова ва Николай Песковни (Николай Чоулз) санкциялар рўйхатига киритди.
Санкция рўйхатига Россия Давлат думаси спикери Вячеслав Володин, Коммунистик партия етакчиси Геннадий Зюганов, шунингдек, унинг партиядошлари Юрий Афонин, Евгений Бессонов, Казбек Тайсаев, Николай Осадчий, Дмитрий Новиков, Иван Мельников, Алексей Куринний, Николай Коломейцев, Владимир Кашин ва Леонид Калашников ҳам киради.
АҚШ Давлат департаменти матбуот котиби Нед Прайснинг айтишича, бу депутатлар Донецк ва Луганск мустақиллигини тан олишга ҳаракат қилган.
Шунингдек, АҚШ молия вазирлиги «Ренова» гуруҳи эгаси, миллиардер Виктор Вексельберг билан боғлиқ Tango номли яхта ва борт рақами P4-MIS бўлган йўловчи самолётини блоклаганини эълон қилди. Миллиардернинг ўзи ҳам аввалроқ АҚШ санкциялари рўйхатига киритилганди.
Аввалроқ АҚШ ҳакерлари Россия ва Украинага киберҳужум қилиш учун Хитой компьютерларини бузиб киргани хабар қилинганди. Шунингдек, АҚШ Алишер Усмоновнинг активларига нисбатан санкцияларни бекор қилгани ҳақида хабар берилди.
