АҚШ молия вазирлиги россиялик миллиардер Алишер Усмоновга тегишли компанияларни санкциялардан чиқариб ташлади. Бу ҳақда АҚШ Хорижий активларни назорат қилиш бошқармаси эълон қилган баёнотда маълум қилинди.

АҚШ Хорижий активларни назорат қилиш бошқармаси (OFAC) директори Андреа Гаки томонидан 3 март куни имзоланган ҳужжатда айтилишича, ҳатто Усмонов 50 фоиздан ортиқ акцияларга эга бўлган компаниялар ҳам санкцияларга дучор бўлмайди.

Ҳужжатга кўра, Усмонов OFAC томонидан блокланган шахслар рўйхатида йўқ — унинг иштирокидаги АҚШда жойлашган юридик шахсларнинг мулки ва улушлари блокдан чиқарилган, уларга ўз ҳисобварақларидан маблағларни чиқариб олишга рухсат берилган.

«Ушбу истисно Усмоновнинг илгари бошқа сабабларга кўра чекланган активлари ёки компанияларнинг молиявий операцияларига тааллуқли эмас», дейилади OFAC ҳужжатида.

Бундан ташқари, 3 март куни АҚШ Россиянинг Украинадаги «ҳарбий операцияси»га жавобан россияликларга қарши янги шахсий санкцияларни эълон қилди. Саккиз киши, уларнинг оила аъзолари билан бирга, блокловчи санкциялар остида қолди. Булар «Транснефть» раҳбари Николай Токарев, «Ростех» раҳбари Сергей Чемезов ва «ВЭБ.РФ» раиси Игорь Шувалов, миллиардерлар Алишер Усмонов, Аркадий Ротенберг ва Борис Ротенберг, бизнесмен Евгений Пригожин ва Президент матбуот котиби Дмитрий Песковлардир.

«Санксияланганлар АҚШ молия тизимидан узилади, активлари музлатилади ва мулклари блокланади», деди Оқ уй матбуот хизмати.

Таъкидланишича, АҚШ маъмурияти миллиардерларга қарши санкциялар ва бунинг натижасида юзага келган молиявий босим уларни Владимир Путиндан узоқлашишга ва уни Украинадаги «ҳарбий операцияни» тўхтатишга мажбур қилишига умид қилмоқда.

Аввалроқ Миллиардер Фарҳод Мошири Алишер Усмоновнинг USM ҳолдинги директорлар кенгашидан кетгани хабар қилинганди. Шунингдек, Германия Алишер Усмоновга тегишли 600 миллион долларлик яхтани мусодара қилгани ҳақида хабар берилди.