Россиялик миллиардер инвестор Юрий Мильнер бир вақтлар Илон Маскнинг SpaceX космик компаниясига инвестиция киритганини айтиб, активни муддатидан олдин сотиб юборгани хато бўлганини таъкидлади. Бу ҳақда бизнесмен Bloomberg Businessweek нашрига берган интервьюсида айтиб ўтди.
Мильнернинг сўзларига кўра, 2013 йилда унинг DST Global жамғармаси SpaceX компаниясига тахминан 10 миллион доллар сармоя киритган ва икки йилдан сўнг улушини 23,56 миллион долларга сотган — бу деярли 2,5 баравар кўп.
«Мен SpaceX’га паст баҳо бердим. Лойиҳани эрта тарк этиш хато эди», — дейди миллиардер.
У кейинчалик космик компаниядаги улушини сотганининг сабабини тушунтирди. Таъкидлашича, у сунъий йўлдошни учириш бозори имкониятларини тўлиқ ҳисоблаб чиқмаган.
Мильнернинг SpaceX компаниясига сармоя киритгани илгари маълум эмас эди.
Милнер — Mail.ru Group (ҳозирда VK деб аталади) компаниясининг собиқ ҳаммуассиси ва директорлар кенгаши раиси. DST Global сармоя киритган компаниялар орасида Airbnb, Alibaba, Twitter ва Facebook ҳам бор.
