«Капиталбанк» акциядорлик тижорат банки VISA карталаридан нақд валюта ечишга 0,7 фоизлик комиссия ўрнатди. Комиссия ўрнатилганини банкнинг амалдаги тарифларида кўриш мумкин.
Банкнинг бу қарори қатор мижозлар томонидан кескин қабул қилинди ва ижтимоий тармоқларда муҳокамаларга сабаб бўлди. Хусусан, блогер Никита Макаренко ўзининг Telegram каналида бундай қарорга келишдан олдин мижозларга барча пулларни комиссиясиз қайтариб олиш имкониятини бериш керак эканлигини ёзди.
«Карточка шартномаси шартларини олдиндан огоҳлантирмасдан ўзгартириш қанчалик қонуний? Мижозларга сиздан барча пулларни олиш имкониятини бериш керак эди. Шахсан мен буни қилишни хоҳлайман, чунки «Капиталбанк»га энди ишончим йўқ.
Эртага улар пул йўқлигини ва сиз сабр қилишингиз кераклигини айтишади. Супер. Мижозларга барча пулларини карталарингиздан комиссиясиз олиш имкониятини беринг, биз кетамиз», — деган блогер.
Банк эса Макаренконинг бу постига жавоб қайтарган. Унга кўра, 0,7 фоизлик комиссия фақат мижознинг ҳисобварақларида 15 кундан камроқ вақт давомида бўлган пул учун амал қилади. 15 кундан ортиқ ҳисобда турган пулни ечиб олишда эса комиссия олинмайди.
Таъкидланишича, мазкур чора Россия ва Ўзбекистон ўртасида пул ўтказмаларидан турли схемалар орқали фойда қилаётганлар оқимини тўхтатиш учун қўлланилган. Улар ўз схемаларидан фойдаланишда 15 кун кута олмаслиги айтилган.
Яъни, пулни ечиб олишда банк мижознинг ҳисобварақларида мазкур маблағ 15 кундан ортиқ ёки ундан камроқ вақт давомида бўлганлигини автоматик равишда текширади. Агар бу муддат узоқроқ бўлса пул комиссиясиз ечилади. Агар бу муддат камроқ бўлса комиссия билан ечилади. Шунингдек, кассирлар мижозларга қандай қилиб комиссиясиз пул ечиш мумкинлигини тушунтириши айтилган.
Қайд этилишча, бу чора вақтинчалик ҳисобланади ва фуқароларни ҳимоя қилишга қаратилган. Банк бу қарор зудлик билан қабул қилинганини, шундай экан, хатолар борлигини тан олишга тайёр эканини маълум қилган. Шунингдек, 2 августдан кечикмай барча ортиқча ушлаб қолинган комиссиялар мижозларга қайтарилиши айтилган ҳамда узр сўралган.
«Ушбу қоидаларни мижозларга аниқ тушунтиришнинг иложи бўлмаганидан афсусдамиз. Келинг, буни тузатамиз!» — дейилган банк баёнотида.
Аввалроқ Ўзбекистондаги бир қатор банклар томонидан ҳисоб-рақамдан нақд валюта ечиб олишда чекловлар жорий этилгани ҳақида хабарлар тарқалганди. Kommers.uz ижтимоий тармоқларда тарқалган хабарлар юзасидан ўрганиш олиб борган.
Унга кўра, «Ипак йўли» банкнинг маълум қилишича, ҳақиқатан ҳам банк томонидан АҚШ доллари сотишда чеклов ўрнатилган. Унга кўра, валюта сотишда банкнинг турли филиалларида касса ҳолатига қараб юқори чегара белгиланган.
Бундан мақсад барча мижозларга валюта етказиш экани маълум қилинган. Чекловлар ҳисоб-рақамдан нақд валюта ечиб олиш, шунингдек, банкдан валюта сотиб олишда ҳам амал қилади.
«Агробанк» расмийлари эса банк ва унинг филиалларида валюта сотиб олиш ва ҳисоб-рақамдан валюта ечишда ҳеч қандай чекловлар йўқлигини таъкидлаган.
