Марказий банк Apelsin электрон пуллар тизимига электрон пуллар чиқаришга рухсат берди. Бу ҳақда регулятор матбуот хизмати хабар берди.
Маълум бўлишича, Bank Apelsin акциядорлик жамияти томонидан Apelsin электрон пуллар тизими фаолиятини ташкил этиш ҳамда мазкур электрон пуллар тизимининг эмитенти сифатида электрон пулларни чиқариш фаолияти бўйича тақдим этилган ҳужжатлар ўрганиб чиқилган.
«Ўзбекистон Республикаси ҳудудида электрон пулларни чиқарилиши ва муомалада бўлиши қоидалари»га кўра, 2022 йилнинг 29 июль куни Apelsin электрон пуллар тизими Марказий банкнинг Электрон пуллар тизими реестрига киритилган ва электрон пуллар чиқарилишига рухсат берилган.
Аввалроқ Ўзбекистонда Bank Apelsin акциядорлик жамиятига банк фаолиятини амалга ошириш ҳуқуқини берувчи лицензия берилганди.
Унга кўра, Марказий банк бошқаруви Тошкент шаҳрида Bank Apelsin акциядорлик жамиятини рўйхатдан ўтказиш ва унга банк фаолиятини амалга ошириш учун лицензия бериш тўғрисида қарор қабул қилган.
