Марказий банк 29 июль куни Pay Way электрон пуллар тизимига электрон пуллар чиқаришга рухсат берди. Бу ҳақда регулятор матбуот хизмати хабар берди.
Маълум бўлишича, тўлов ташкилоти лицензиясига эга бўлган Pay Way масъулияти чекланган жамияти томонидан Pay Way электрон пуллар тизими фаолиятини ташкил этиш ҳамда Bank Apelsin акциядорлик жамияти томонидан мазкур электрон пуллар тизимининг эмитенти сифатида электрон пулларни чиқариш фаолияти бўйича тақдим этилган ҳужжатлар ўрганиб чиқилган.
Шунингдек, «Ўзбекистон Республикаси ҳудудида электрон пулларни чиқарилиши ва муомалада бўлиши қоидалари»га кўра, 29 июль куни Pay Way электрон пуллар тизими Марказий банкнинг Электрон пуллар тизими реестрига киритилган. Ва Pay Way’га электрон пуллар чиқаришга рухсат берилган.
Аввалроқ Марказий банк Apelsin’га электрон пуллар чиқаришга рухсат берганди. Унга кўра, Apelsin электрон пуллар тизими Марказий банкнинг Электрон пуллар тизими реестрига киритилган.
Шунингдек, Ўзбекистонда Bank Apelsin акциядорлик жамиятига банк фаолиятини амалга ошириш ҳуқуқини берувчи лицензия берилган.
Унга кўра, Марказий банк бошқаруви Тошкент шаҳрида Bank Apelsin акциядорлик жамиятини рўйхатдан ўтказиш ва унга банк фаолиятини амалга ошириш учун лицензия бериш тўғрисида қарор қабул қилган.
