Миллиардер Павел Дуров Apple Telegram мессенжерини янгилашни ҳеч қандай изоҳсиз икки ҳафтага кечиктираётганини маълум қилди. Мессенжер асосчиси бу ҳақда ўзининг каналида ёзди.
Дуровнинг сўзларига кўра, Telegram’нинг яқинлашиб келаётган янгиланиши «одамларнинг хабар алмашиш чоғида ўз фикрларини билдиришида инқилоб қилиши» керак.
Бироқ унинг қайд этишича, янгиланиш Apple барча мобил иловалардан икки ҳафта давомида ўтишини талаб қиладиган «кўриб чиқиш жараёнида» қолиб кетган.
«Дунёдаги энг оммабоп 10 та иловадан бири бўлган Telegram’га шундай муносабатда бўладиган бўлса, кичикроқ дастур ишлаб чиқувчилар дуч келадиган қийинчиликларни тасаввур қилиш мумкин», — деб ёзган Дуров.
Унинг сўзларига кўра, бу нафақат руҳий тушкунликка олиб келади, балки бутун дунё бўйлаб «юз минглаб» мобил иловаларга бевосита молиявий зарар етказади.
У Apple ва Google ишлаб чиқувчилардан оладиган 30 фоиз тўловни қўшимча зарар деб атади. Дуров бир неча бор ушбу йиғимга қарши чиқди ва дастурларни тарқатишда Apple монополиясини тўхтатишга чақирди.
Миллиардер, шунингдек, Европа Иттифоқи ва бошқа мамлакатлардаги тартибга солувчилар аста-секин суиистеъмолларга эътибор қарата бошлаганини қўшимча қилди.
«Аммо Apple технология саноатига етказган иқтисодий зарарни тузатиб бўлмайди», — дея шикоят қилди у.
Бу биринчи айблов эмас
Аввалроқ Дуров Apple’ни иловаларнинг веб-версияларини, хусусан Telegram Web’ни атайлаб чеклаганликда ҳам айблаган эди.
Тадбиркорнинг сўзларига кўра, iOS қурилмаларида мессенжернинг веб-версиясини тўлиқ ишлаб чиқиш иложсиз.
«Apple фойдаланувчиларни App Store’дан иловалар юклаб олишга ундаш учун веб-версияларнинг сифатини атайлаб пасайтириши мумкин, бунинг учун комиссия олади», — деганди Дуров.
Аввалроқ Павел Дуров ўзининг инглиз тилидаги расмий Telegram каналида WhatsApp танқид қилинган пост ёзганди. Тадбиркорнинг Boldernd тадқиқотидан келтирган сўзларига кўра, Meta компаниясининг мессенжери потенциал ҳужумчиларга нисбатан заифлигини яна бир бор исботлаган.
