Иқтисодчи Отабек Бакиров Kommers.uz’га берган интервьюсида аҳоли ўртасида онлайн омонатлар оммалашганига қарамай, бевосита банкка бориб омонат расмийлаштирувчилар сони ва суммаси камаймаётганини таъкидлади.

Иқтисодчининг қайд этишича, бунга омонатларни кўпроқ катталар шакллантириши сабаб бўлади. Катта ёшли омонатчилар ҳалигача барча офлайн жараёнлардан ўтиб омонат расмийлаштиришни лозим деб билади.

«Онлайн омонотларнинг асосий фойдаланувчилари бу янги авлод, замонавий технологиялардан доимий равишда фойдаланиб келадиган ва уларнинг афзалликларини кўриб келадиган авлод ҳисобланади. Айни вақтда Ўзбекистон шароитида сони бўйича энг катта омонотчилар бу катта ёшли омонатчилар ҳисобланади.

Бундай тоифадаги омонатчилар банкка бориб, барча жараёнлардан ўтиб омонат расмийлаштиришни ҳалигача лозим деб кўради. Онлайн омонатчилар сони ошиб бораётганига қарамай, айни вақтда офлайн омонатчилар сони ва суммаси камаяётгани йўқ. Ва бу тенденция ҳали анча муддат сақланиб қолади.

Сабаби бутун дунёда омонатларни кўпроқ катталар шакллантиради, кредитлардан кўпроқ ёшлар фойдаланади. Инсон ҳаётининг маълум даврида даромадлари кўпроқ, маълум даврида ҳаражатлари кўпроқ бўлади. Бу энди табиий тенденция», — деди Отабек Бакиров.

Суҳбатни тўлиқ қуйида томоша қилиш мумкин:

Аввалроқ Иқтисодчи Исмоил Туропов Kommers.uz’га берган интервьюсида сўнгги 2-3 йилда аҳоли ўртасида онлайн омонатлар оммалашгани ва бу омонатлар бозорида катта ютуқ бўлганини таъкидлаганди. Унинг қайд этишича, пандемия туфайли масофавий хизматлар ривожланиши фонида онлайн омонатлар ҳажми ошган.