Ўзбекистонда келгуси беш йил давомида олтин захирасини қўшимча 879 тоннага ошириш бўйича ишлар бошланган. Бу ҳақда Шавкат Мирзиёевга тоғ-кон саноати ва геология соҳасида рақамли технологияларни жорий этиш юзасидан ўтказилган тақдимотда маълум қилинди.

Қайд этилишича, олтин билан бир қаторда кумуш захирасини қўшимча 510 тоннага, мис захирасини эса 676 минг тоннага ошириш режалаштирилган. Ушбу натижаларга геология-қидирув ишларини кенгайтириш, мавжуд маълумотларни рақамлаштириш ва сунъий интеллект технологияларини жорий этиш орқали эришиш кўзда тутилмоқда.

Маълум қилинишича, геологик маълумотларни тезкор таҳлил қилиш, фойдали қазилмаларни прогнозлаш, захираларни аниқ ҳисоблаш ҳамда бурғилаш ишлари самарадорлигини ошириш учун сунъий интеллект ечимлари қўлланади. Бу янги конларни аниқлаш имкониятларини кенгайтиради ва геология-қидирув жараёнларини тезлаштириши таъкидланди.

Шунингдек, геологик маълумотларни ягона электрон базага жамлаш ва уларни 3D моделлар орқали таҳлил қилиш тизимини яратиш режалаштирилмоқда. Бунинг учун Геологик маълумотлар миллий базаси ташкил этилиб, мавжуд 36 мингдан ортиқ ҳисобот ва бирламчи маълумотлар рақамлаштирилади.

Президент соҳада технологик трансформацияни жадаллаштириш, ишлаб чиқариш жараёнларида сунъий интеллектдан кенг фойдаланиш ва геология-қидирув ишларининг самарадорлигини ошириш бўйича тегишли топшириқлар берди.

Ушбу тақдимотда Ўзбекистон 2030 йилгача геология ва тоғ-кон саноатига 30 миллиард доллардан ортиқ инвестиция жалб қилиши режалаштирилаётгани ҳам таъкидланганди. Бунинг учун геологик маълумотларни тўлиқ рақамлаштириш ва сунъий интеллект технологияларини кенг жорий этиш кўзда тутилган.