Давлат банкларида муаммоли кредитлар миқдори кескин ошди
Қайтарилмаётган фоизли қарзларнинг 16,7 триллион сўми давлат банклари ҳиссасига тўғри келмоқда.
Ўзбекистонда 2026 йил май ойида банклардаги муаммоли кредитлар миқдори 1,7 триллион сўмга (7,7 фоиз) кўпайди. Бу ҳақда Марказий банк маълум қилди.
1 июнь ҳолатига кўра, республикада муаммоли кредитларнинг жами қиймати 23,6 триллион сўмдан ошган. Бу кўрсаткич 1 май куни 21,9 триллион сўмни ташкил этганди.
Қайтарилмаётган фоизли қарзларнинг 16,7 триллион сўми давлат банклари ҳиссасига тўғри келмоқда (бир ой олдингидан 1,6 триллион сўмга кўп). Қолган қисми (6,9 триллион сўм) хусусий банкларга тегишли (бир ойда 100 миллиард сўм ошган).
Энг йирик миқдордаги муаммоли кредитларни еттита (жами тўққизта давлат банки мавжуд) давлат банки ажратган. Биринчи ўринда қайтарилмаётган 3,54 триллион сўм кредитлари билан Ўзмиллийбанк турибди. Кейинги ўринларни қуйидаги давлат банклари эгаллаган:
- Агробанк — 3,1 триллион сўм;
- Ўзсаноатқурилишбанк — 2,1 триллион сўм;
- Асака банк — 1,94 триллион сўм;
- Микрокредитбанк — 1,78 триллион сўм;
- Халқ банки — 1,75 триллион сўм;
- Бизнесни ривожлантириш банки — 1,1 триллион сўм.
Хусусий банклардан қайтариш муддати ўтган кредитлар миқдори йириклиги бўйича Капитал банк биринчи ўринга чиққан — 1,3 триллион сўм. Кейинги ўринни Ипотека-банк эгаллаган бўлиб, жами 1 триллион сўмдан ортиқ муаммоли кредитлари мавжуд.
2025 йил якунида банкларга қайтарилмаётган фоизли қарзлар миқдори 18,05 триллион сўмгача қисқарганди. Бироқ жорий йилда мазкур кўрсаткич ўсиб бормоқда. Жумладан, январь ойида 19,3 триллион сўмга, февралда 20,2 триллион сўмга етган. Март ойида қисқариш кузатилиб 19,86 триллион сўмни ташкил этган. Апрелга келиб, қайтарилмаётган қарзлар улушига яна икки триллион сўм қўшилган.
Умуман олганда, республикада охирги беш йил давомида муаммоли кредитлар улуши сезиларли ортган. Хусусан, 2021 йил 1 январда жами муддати ўтган қарзлар 5,8 триллион сўм эди. Орадан бир йил ўтиб бу рақам бирданига 17 триллион сўмга чиққан. Мазкур кескин ўсиш пандемия ва ундан кейинги тикланиш даврига тўғри келган. 2023 йил январда 14 триллион сўмлик, 2024 йил бошида 16,6 триллион сўмлик муаммоли кредитлар қайд этилган. 2025 йил январида муаммоли қарзлар 21 триллион сўмдан ошиб кетганди.
