Россиянинг Новосибирск вилояти аҳолиси банк карталари расмийлаштириш учун Ўзбекистон, Қозоғистон ва Қирғизистонга оммавий саёҳат қилмоқда. Бу ҳақда «Сиб.фм» хабар берди.
Маълум бўлишича, 2022 йилнинг июль-август ойларида бу мамлакатларга ташриф буюрган ҳар учинчи сайёҳ у ерда банк карталарини расмийлаштирган. Таъкидланишича, Новосибирск вилоятида аллақачон қўшни давлатларга 3–4 кунлик махсус «карта-турлар» пайдо бўлмоқда. Хорижий давлатларда банк карталарини расмийлаштириш жараёни айнан шунча вақт давом этади.
Маҳаллий аҳоли вакилларидан бирининг айтишича, Европада таҳсил олаётган жиянига пул ўтказиш, интернет хизматлари учун ҳақ тўлаш учун хорижий карта керак бўлади.
Таъкидланишича, картани олиш учун Қирғизистон ҳудудида бўлиш, шунингдек, паспорт, чет элга чиқиш паспорти ва паспортда чегарани кесиб ўтганликни тасдиқловчи муҳр бўлиши керак. Нашр журналистларининг ҳисоб-китобларига кўра, парвоз ва чет элда яшашни ҳисобга олган ҳолда карта-тур тахминан 40 минг рублга тушади (таҳминан 7 миллион 300 минг сўм — таҳририят).
Аввалроқ Ўзбекистондаги бир қатор банклар томонидан ҳисоб-рақамдан нақд валюта ечиб олишда чекловлар жорий этилгани ҳақида хабарлар тарқалганди. Kommers.uz ижтимоий тармоқларда тарқалган хабарлар юзасидан ўрганиш олиб борган.
«Ипак йўли» банкнинг маълум қилишича, ҳақиқатан ҳам банк томонидан АҚШ доллари сотишда чеклов ўрнатилган. Унга кўра, валюта сотишда банкнинг турли филиалларида касса ҳолатига қараб юқори чегара белгиланган.
Бундан мақсад барча мижозларга валюта етказиш экани маълум қилинди. Чекловлар ҳисоб-рақамдан нақд валюта ечиб олиш, шунингдек, банкдан валюта сотиб олишда ҳам амал қилади.
