Осиё тараққиёт банки Ўзбекистоннинг 4 та шаҳрини ривожлантиришга 59 млн доллар ажратади
ОТБ шаҳарсозлик лойиҳаси пандемиядан кейин тўхтаб қолган ва иқлим ўзгаришига заиф бўлган шаҳарлар учун қарз ажратди
ОТБ Ўзбекистоннинг тўртта – Жиззах, Ховос, Хива ва Янгиер шаҳарларида турмуш шароитини яхшилаш ва иқтисодий рақобатбардошликни ошириш учун 59 миллион АҚШ доллар миқдорида кредит ва 500 минг АҚШ доллар миқдорида грант ажратилишини маъқуллади.
«ОТБнинг интеграциялашган шаҳарсозлик лойиҳаси Covid-19 пандемиясидан кейин тўхтаб қолган ва иқлим ўзгаришига заиф бўлган Жиззах, Ховос, Хива ва Янгиер шаҳарларида коммунал инфратузилма ва хизматларга стратегик инвестицияларни қўллаб-қувватлайди», – дейилади хабарда.
Маблағлар Ховосда кўп функцияли жамоатчилик марказини ўз ичига олган ва умумий яшил йўлакчага эга бўлган янги жамоат боғи, хамда Хивада Ипак йўли мавзуида Ўзбекистондаги биринчи рақамли музей жойлашган икки қаватли ташриф буюрувчилар марказини барпо этишга йўналтирилади. Шунингдек, лойиҳа Жиззахда экологик хавфсиз сувни тежовчи технологиялар қўлланилган сув тармоқларини ривожлантириш ва барча тўртта шаҳарда қаттиқ маиший чиқиндиларни бошқариш тизимини такомиллаштиришни қўллаб-қувватлайди.
ОТБнинг Марказий ва Ғарбий Осиё бўйича Бош директори Евгений Жуковнинг сўзларига кўра, шаҳарларнинг комплекс ва иқлимга чидамли тарзда ривожланиши у ерда яшовчи аҳолининг ҳаёт сифатини сезиларли даражада яхшилаш орқали ўрта шаҳарларнинг иқтисодий рақобатбардошлигини ошириш имконини беради.
ОТБ, шунингдек, рақамли музей ташкил этиш учун 500 минг АҚШ доллари миқдорида грант ажратади.
