2026 йил I чораги якунида Ўзбекистоннинг давлат қарзи (кредитлари) 47 млрд долларга етди. Бу 2025 йил мос даврига нисбатан 4,4 млрд долларга кўп.

Иқтисодиёт ва молия вазирлиги давлат кафолати остида олинган кредитларнинг 39,8 млрд доллари (85 фоизи) ташқи, 7,2 млрд доллари (15 фоизи) ички қарз эканини очиқлади. Олинган қарзлар миқдорининг асосий ўсиши ташқи қарз ҳиссасига тўғри келган (4,2 млрд доллар).

Ташқи қарз тақсимоти

Давлат ташқи қарзининг 19,7 млрд доллари бюджет тақчиллигини қоплашга сарфланган. Вазирлик таҳлилига кўра, қолган маблағлар қуйидаги соҳаларга йўналтирилган:

• Ёқилғи-энергетика саноатига — 5,6 млрд доллар;
• Транспорт — 3 млрд доллар;
• Қишлоқ ва сув хўжалиги — 3,3 млрд доллар;
• Уй-жой коммунал хўжалиги — 3,2 млрд доллар;
• Соғлиқни сақлаш, таълим, ахборот ва коммуникация технологиялари ҳамда бошқа секторлар — 3,6 млрд доллар.

Ўз навбатида тадбиркорликни қўллаб-қувватлашга 624 млн доллар, кимё саноатини ривожлантиришга 607 млн доллар берилгани билдирилган.

Энг йирик қарз берувчилар

Давлат ташқи қарзининг 22,3 млрд доллари (56 фоизи) халқаро молия институтларидан олинган. Жумладан, энг йирик кредитор Жаҳон банки бўлиб турибди — 9,04 млрд доллар. Кейинги навбатда мамлакатнинг Осиё тараққиёт банкидан қарз қолдиғи 8,3 млрд долларни ташкил этган.

Шу билан бирга Ўзбекистон Осиё инфратузилмавий инвестициялар банкидан 2,3 млрд доллар, Ислом тараққиёт банкидан 1,1 млрд доллар қарздор.

Давлат ташқи қарзининг 11,6 млрд доллари (29 фоизи) хорижий ҳукуматларнинг молия ташкилотларидан жалб қилинган. Хусусан, республикага Хитой банклари 3,9 млрд доллар, Япония халқаро ҳамкорлик агентлиги ва бошқа ташкилотлари 3,1 млрд доллар ажратган.

Қарзларнинг 5,8 млрд доллар облигациялар чиқариш орқали инвесторлардан олинган.