Ўзбекистонда халқаро ва шаҳарлараро автобусларга чипта харид қилиш учун мобил илова ишга туширилди
Тошкент автовокзалидан автобусларга чипталарни электрон шаклда сотиб олиши мумкин бўлди. Бунинг UzBus мобил иловаси ишга туширилди. Иловада йўловчилар реал вақт режимида автовокзалдан шаҳарлараро ва халқаро рейслар жадвали билан танишиш, танланган йўналиш бўйича чипталар нархини билиш имкониятига эга бўлади
UzBus иловаси орқали фойдаланувчилар Тошкент автовокзалидан автобусларга чипталарни электрон шаклда сотиб олиши мумкин бўлади. Бу ҳақда Транспорт вазирлиги ахборот хизмати хабар берди.
Қайд этилишича, иловада йўловчилар реал вақт режимида Тошкент автовокзалидан шаҳарлараро ва халқаро рейслар жадвали билан танишиш, танланган йўналиш бўйича чипталар нархини билиш имкониятига эга бўлади. Ҳозирда UzBus иловаси орқали Бухоро—Тошкент йўналишидаги автобус қатновларига электрон чипта харид қилиш мумкин.
«Босқичма-босқич илова орқали республиканинг барча вилоятларидан Тошкентга саёҳатлар учун чипталарни электрон харид қилиш имкониятлари кенгайтирилиши режалаштирилмоқда», дейилади вазирлик ахборотида.
Мобил илова ҳозирча фақат Android фойдаланувчилари учун мавжуд.
Аввалроқ тадбиркорлар ўзларининг фаолиятидаги текширувлар юзасидан маълумот олиши учун «Ягона давлат назорати» ахборот тизими ишга туширилгани ҳақида хабар берилганди.