Ўзбекистонда 2022 йили аҳолига 14,4 трлн сўм ипотека кредитлари ажратилди

Ўзбекистонда 2022 йил якунлари бўйича аҳолига ажратилган ипотека кредитлари 14,4 трлн сўмни ташкил этиб, 2021 йилга нисбатан қарийб 1,5 баробарга ошди ҳамда унинг қолдиғи 46,4 трлн сўмга (2021 йилнинг мос даврига нисбатан 1,3 баробарга ошди) етди

Ўзбекистонда 2022 йили аҳолига 14,4 триллион сўм ипотека кретидлари ажратилди. Бу ҳақда Марказий банкнинг ипотека кредитлари шарҳида маълум қилинди.

Қайд этилишича, 2022 йил якунлари бўйича аҳолига ажратилган ипотека кредитлари 14,4 триллион сўмни ташкил этиб, 2021 йилга нисбатан қарийб 1,5 баробарга ошган ҳамда унинг қолдиғи 46,4 триллион сўмга (2021 йилнинг мос даврига нисбатан 1,3 баробарга ошди) етди. Бунда, мазкур кредитларнинг аҳолига ажратилган жами кредитлар қолдиғидаги улуши 46 фоизни ташкил этди.

Шунингдек, 2022 йилда ажратилган ипотека кредитларида Молия вазирлиги маблағлари ҳисобидан ажратилган кредитларнинг улуши 2021 йилдаги 92,1 фоиздан 73,7 фоизгача пасайган бўлса, тижорат банклари маблағларининг улуши 9 фоиздан 26,3 фоизгача ошган.

Мазкур даврда ажратилган жами ипотека кредитларининг 10,8 триллион сўми ёки 75 фоизи (ипотека шартномалари сонига нисбатан) бирламчи бозордаги уйлар, 3,6 триллион сўми ёки 25 фоизи иккиламчи бозордаги уйлар сотиб олишга йўналтирилган.

Шу билан бирга, 2022 йилда нотариус идоралари томонидан жами тасдиқланган уй-жой олди-сотди шартномалар сони 250,3 мингтани ташкил этиб, шундан 70,9 мингтаси ёки жами олди-сотди шартномаларнинг 28 фоизи ипотека кредитлари ҳисобидан молиялаштирилган шартномалар ҳиссасига тўғри келади.

Ипотека кредити ҳудудлар кесими бўйича

Инфографика: Марказий банк матбуот хизмати

Ҳудудлар кесими бўйича таҳлил қилинганда, 2023 йил 1 январь ҳолатига ажратилган ипотека кредитларининг 60 фоизи 5 та ҳудудлар ҳиссасига тўғри келиб, бунда 29,9 фоизи (4 302,5 миллиард. сўм) Тошкент шаҳри, 8,2 фоизи (1 178,9 миллиард сўм) Самарқанд, 8 фоизи (1 149,4 миллиард сўм) Фарғона, 7,4 фоизи (1 066,2 миллиард сўм) Андижон ва 6,4 фоизи (919,1 миллиард сўм) Навоий вилоятида истиқомат қилувчи фуқароларга ажратилган.

Аввалроқ банклар томонидан 2022 йил давомида аҳолига 65,3 триллион сўм миқдорида ёки 2021 йилга нисбатан 45 фоиз ортиқ кредитлар ажратилгани ҳақида хабар берилганди. Ушбу кредитлар таркибида автокредитлар 10,9 триллион сўмга, ипотека кредитлари 10,6 трлн сўмга ва микроқарзлар 6,2 триллион сўмга ўсган.

Koʻrishlar soni: 1 893