Ўзбекистонда 2022 йили аҳолига 65 трлн сўмдан ортиқ кредит ажратилди
Банклар томонидан 2022 йил давомида аҳолига 65,3 трлн сўм миқдорида ёки 2021 йилга нисбатан 45 фоиз ортиқ кредитлар ажратилган. Ушбу кредитлар таркибида автокредитлар 10,9 трлн сўмга, ипотека кредитлари 10,6 трлн сўмга ва микроқарзлар 6,2 трлн сўмга ўсган
Ўзбекистонда банклар томонидан 2022 йил давомида 203 триллион сўм миқдорида ёки 2021 йилга нисбатан 22 фоиз ортиқ кредитлар ажратилган. Бу ҳақда Марказий банк матбуот хизмати хабар берди.
Маълум қилинишича, мазкур кредитларнинг 68 фоизи (137,8 триллион сўм) корпоратив ва 32 фоизи (65,3 триллион сўм) аҳолига ажратилган кредитлар ҳиссасига тўғри келади.
Корпоратив кредитларнинг 37 фоизи (ёки 51 триллион сўмини) айланма маблағларни тўлдириш учун ажратилган револьвер кредитлардир. Шунингдек, ажратилган кредитларнинг 31 фоизи қисқа муддатли ва 69 фоизи узоқ муддатли, валюталар қирқимида эса 65 фоиз кредитлар миллий валютада ва 35 фоиз хорижий валютадаги кредитлар ҳиссасига тўғри келади.
Шу билан бирга, мазкур даврда тижорат банклари томонидан 136 триллион сўмлик кредитлар сўндирилган, қайтувчанлик даражаси эса 67 фоизни ташкил этган.
Банкларнинг жами кредит қўйилмалари қолдиғи 2023 йил 1 январь ҳолатига 390 триллион сўмни ташкил этиб, уларнинг 74 фоизи корпоратив кредитлар, 26 фоизи чакана кредитлар ҳиссасига тўғри келади.
Жами кредит портфели қолдиғи 2021 йилнинг мос даврига нисбатан 20 фоизга ёки 63,7 триллион сўмга, хусусан, корпоратив кредитлар 13 фоизга (32,2 триллион сўм) ва аҳоли кредитлари 45 фоизга (31,5 триллион сўм) ўсган.
Аҳолига ажратилган кредитлар таркибида автокредитлар 10,9 триллион сўмга (2021 йилга нисбатан 2 баробарга), ипотека кредитлари 10,6 триллион сўм (30 фоизга) ва микроқарзлар 6,2 триллион сўмга (1,7 баробарга) ўсган.
Аввалроқ Ўзбекистоннинг 29 та тижорат банки учун «Банклар фаоллик индекси» янгиланиб, унинг асосида банкларнинг чораклик рейтинги тузилгани ҳақида хабар берилганди. Индексни ҳисоблашда банк кўрсаткичлари молиявий воситачилик, молиявий оммабоплик, капиталнинг етарлилиги, активлар сифати, бошқарув самарадорлиги, даромадлилик ҳамда ликвидлик йўналишларда қўлланилган